Өнөөдөр (2022.11.07) "Виртуал хөрөнгө эзэмшигчдийн эрх ашгийг хамгаалах холбоо" ТББ-аас мэдээлэл хийлээ.

Уг мэдээллийн үеэрээ тус ТББ-ын гишүүд: "Сүүлийн 2 жилийн хугацаанд нийтдээ 70 гаруй койн, токен зах зээл дээр гарч, 500 гаруй тэрбум төгрөгийг иргэдээс босгосон байна. Үүнийг дагаад иргэд мөнгө, хөрөнгөө алдах, луйвардуулах зэрэг муу үр дүн их гарч байгаа учраас "Виртуал хөрөнгө эзэмшигчдийн эрх ашгийг хамгаалах холбоо" ТББ-г байгуулан, хуулийн хүрээнд төрийн байгууллагуудтай хамтран аль нь ажлаа жинхэнэсээ хийсэн болон аль нь луйвар хийсэн юм бэ? гэдгийг ялгаж, эрх ашиг нь зөрчигдөөд байгаа иргэдийн өмнөөс ажиллая гэж энэ ажлыг эхлүүлсэн. Бидний хийх бүх ажил хуулийн хүрээнд явагдана.

Өнөөдрийн байдлаар 23 бирж байгаагаас 3 нь албан ёсны зөвшөөрөлтэй үйл ажиллагаа явуулж байна. Монгол улсын хэмжээнд 70 гаруй койн зах зээл дээр гарснаас 36 койн нь одоогоор арилжаа хийгдэж байна. Урьдчилсан худалдаа хийгдээд буюу хөрөнгө босгочихоод алга болчихсон 4 койн байна. Анхдагч худалдаа хийчхээд алга болсон мөн 4 койн байна. Иргэдээс мөнгө босгочихоод огт гараагүй 19 койн байна.

Эдгээр койнууд дээр хяналт шалгалт явуулна." гэсэн бол тус ТББ-ын гишүүн Г.Ирээдүй: "Миний хувьд 2021 оны 11 сард IZC нэртэй койн гаргаж байсан. 16,000 гаруй хүнээс 20,4 тэрбум төгрөг хуримтлуулсан хэдий ч энэ зах зээл нуран уналттай байсан тул эдгээр мөнгийг буцаан олгосон. Буцаан олгохдоо 500 гаруй сая төгрөгийг давхардуулж илгээсэн. Давхар илгээсэн мөнгө хуулийн дагуу буцаж орж ирэх ёстой ч орж ирээгүй тэр хүмүүстээ үлдсэн.

Зарим хүмүүс IZC 20 тэрбум төгрөг буцаагаад өгчихсөн. Тийм учраас бусад койны мууг үзэж байна гэж хараад байх шиг байна. Тэдэнд хандаж хэлэхэд би 20 тэрбумд хотойх эр хүн биш. Хүн бүр блокчейн гэдэг зүйлийг ойлгодог болсон цагт IZC-гээ гаргах бодол бий. Гэхдээ ойрын хэдэн жилдээ бол биш. Ер нь нийт гарсан койны 90 хувь нь 100 айлын би чаднууд байхгүй юу.

Манай IZC койн нийтдээ 25 тэрбум төгрөг цуглуулах зорилготой байсан хэдий ч 20,4 тэрбум төгрөг цуглаж, зорилгодоо хүрээгүй учраас эдгээр мөнгийг буцааж өгсөн. Хэрэв тэр хүмүүсийн мөнгө хэрэгтэй байсан бол би авчих л байсан." гэсэн юм.