Хэрвээ Украины эсрэг цөмийн зэвсэг хэрэглэвэл ОХУ-ын зэвсэгт хүчнийг “устгах” тухай Өрнөдийн орнууд анхааруулжээ.

Пүрэв гарагт Бельги улсад Дипломат Академийн нээлтэд оролцож, үг хэлэхдээ Европын Холбооны гадаад бодлогын тэргүүн Жозеп Боррель “Путин хоосон сүрдүүлээгүй гэдгээ хэлсэн. Тэр хоосон сүрдүүлээгүй юм бол Украиныг дэмжигч хүмүүс, Европын Холбоо болон түүний гишүүн орнууд, АНУ, НАТО бас хоосон сүрдүүлэхгүй гэдгээ тодорхой хэлэх хэрэгтэй. Украины эсрэг цөмийн зэвсэг хэрэглэсэн тохиолдолд бид адилхан цөмийн цохилтоор хариу барихгүй, гэхдээ Оросын армийг устгах хэмжээний хүчтэй хариу арга хэмжээ авах болно” гэж мэдэгдсэн байна.

Саяхан Украины дөрвөн бүс нутгийг ОХУ өөртөө хүчээр нэгтгэсний дараа Москвагийн эрх баригчид эзэлсэн газраа хамгаалахын тулд тактикийн цөмийн зэвсэг хэрэглэж болзошгүй гэсэн айдас нэмэгдсэн юм.

Жозеп Боррелийн өчигдөр хэлсэн үг Өрнөдийн удирдагчдын Москвад өгсөн анхны анхааруулга биш.

НАТО-гийн ерөнхий нарийн бичгийн дарга Йенс Столтенбэрг бас цөмийн зэвсэг хэрэглэсэн тохиолдолд Орос улс “хатуу үр дагавар” амсахыг өмнө нь анхааруулж байв.

“Бид яг ямар хариу арга хэмжээ авахаа хэлэхгүй. Гэхдээ мөргөлдөөний мөн чанарыг үндсээр нь өөрчлөх хэмжээний хариу барих болно. Бага хэмжээний цөмийн зэвсэг хэрэглэхийг ч маш нухацтай хүлээж авна” гэж Столтенбэрг хэлж байжээ.

Гэхдээ тэр НАТО цөмийн зэвсэг хэрэглэх магадлал маш бага байгааг давхар сануулсан юм.

“НАТО-гийн цөмийн зэвсгийн үндсэн зорилго нь энх тайвныг сахин хамгаалах, түрэмгийллийг таслан зогсоох, НАТО-гийн холбоотнуудад шахалт дарамт үзүүлэхээс сэргийлэх явдал юм. Гэхдээ НАТО цөмийн зэвсэг хэрэглэхээс өөр аргагүй нөхцөл байдал үүсэхэд маш хол байна” гэж Столтенбэрг хэлжээ.

Эх сурвалж: AFP