Дэлхий дахинд k-pop урсгалыг таниулсан гавьяатай гэгддэг BTS хамтлагийн гишүүд бүгд хуулийн дагуу хугацаат цэргийн албаа хаахаар болсныг тус хамтлагийн менежмэнтийг хариуцдаг агентлаг өнөөдөр мэдээлжээ.
Хамтлагийн хамгийн ахмад гишүүн Жин энэ оны арванхоёрдугаар сард 30 нас хүрэх бөгөөд хуулийн дагуу үүнээс өмнө цэргийн албаа хаах болоод байгаа юм.
“Жин цэргийн алба хаах хугацааг хойшлуулах хүсэлтээ энэ сарын сүүлээр цуцалж, цэрэг татлагын удирдах газраас гаргасан журмыг дагаж мөрдөхөөр боллоо. Бусад гишүүд тус тусын төлөвлөгөөний дагуу цэргийн хугацаат албаа хаах болно” гэж Big Hit Music агентлагийн мэдэгдэлд өгүүлжээ.
Өмнөд Солонгосын хуулиар эрүүл мэндийн шаардлага хангасан бүх эрчүүд 30 нас хүрэхээсээ өмнө хоёр жил орчим хугацаанд цэргийн алба хаах үүрэгтэй байдаг.
Одоогийн хуулиар зөвхөн тив, дэлхийд амжилт гаргасан тамирчид болон сонгодог хөгжмийн уран бүтээлчид цэргийн албанаас чөлөөлөгдөж, орлуулан хаах боломжтой байдаг.
Харин BTS шиг k-pop салбарын уран бүтээлчдийг чөлөөлөх эсэх асуудал Өмнөд Солонгосын нийгэмд маргааны сэдэв болж байгаа.
Ийм өөрчлөлт оруулах хуулийн төслийг тус улсын парламент хэлэлцэх асуудлынхаа жагсаалтад оруулсан нь одоо хүртэл хүлээгдэж байна.
Эх сурвалж: Yonhap News