Үндэсний агаарын тээвэрлэгч МИАТ ТӨХК-ийн EI-FGN бүртгэлийн дугаартай В767-300ER агаарын хөлгийг Их Британи, Умард Ирландын Нэгдсэн Вант улсын “PEMBROKE AIRCRAFT LEASING” түрээсийн компаниас түрээслэн авч 2016 оны 6 сараас нислэгийн үйл ажиллагаанд ашиглаж эхэлсэн билээ.
Мөнх хааны нэрээр овоглосон мөнгөн цагаан хөлөг маань 5 жилийн түрээсийн гэрээгээ дуусгаад 2021 оны 1-р сарын 18-ны өдөр багш нисгэгч Ц.Ганбаатар, агаарын хөлгийн дарга П.Баатар, 2 дугаар нисгэгч С.Өнөбилэг нар жолоодон Буянт-Ухаа ОУНБ-аас хөөрч АНУ-ын Аризоны мужийн Phoenix Goodyear нисэх буудалд амжилттай газарджээ.
В767-300ER агаарын хөлөг түрээсийн хугацаанд нийт 1390 аяллаар 560,498 зорчигч, 7878 тн ачаа тээвэрлэн нийт 10621 блок цагийн нислэг үйлдэж хоёрыг уулзуулж, холыг ойртуулах үүргээ амжилттай гүйцэтгэн ийнхүү буцаж байна.
Монгол түмэндээ үр өгөөжөө хайрласан мөнгөн цагаан хөлөгтөө баярлалаа.
