Зах зээлийн үнэлгээгээр Tencent технологийн аварга компани сүүлийн зургаан жилийн турш Хятадад тэргүүлж байв.
Нэгэн үе үнэлгээ нь бараг $1 их наяд хүрч байсан бол харин одоо үүнийхээ талд ч хүрэхгүй болжээ.
Есдүгээр сарын 30-ны өдрийн байдлаар Tencent компани хамгийн өндөр үнэлгээтэй компанийн титмээ архи үйлдвэрлэгч Квэйчоу Маотай компанид алдсан байна.
2021 оны нэгдүгээр сард Tencent компанийн зах зээлийн үнэлгээ $950 тэрбум орчим байсан бол 22 сарын дараа $325 тэрбум болж буурчээ.
Өчигдөр өдрийн байдлаар тус компанийн үнэлгээ бага зэрэг өсөж, $302.5 тэрбумд хүрэхдээ Квэйчоу Маотайн $300.1 тэрбумаас ялихгүй хэмжээгээр давсан байна.
Квейчоу Маотай бол Хятадын хамгийн алдартай дотоодын брэндүүдийн нэг. Тус компанийн 53 хувийн спиртийн найрлагатай Маотай Байжиу хатуу дарсыг албан хүлээн авалтуудад түгээмэл хэрэглэдэг.
1972 онд Хятадад айлчилсан АНУ-ын ерөнхийлөгч Ричард Никсоныг энэ архиар дайлж байсан юм.
Тус компанийн борлуулалт энэ оны эхний есөн сарын хугацаанд 19.1 хувиар өссөн нь iMoutai онлайн худалдааны шинэ салбар нээгдсэнтэй холбоотой гэж зах зээл судлаачид үзэж байна.
Сүүлийн жилүүдэд Бээжингийн эрх баригчид тус улсын технологийн салбарын хяналт зохицуулалтыг чангатгах болсон нь Tencent зэрэг аварга компаниудын үнэлгээг унагаад байгаа юм.
Өнгөрсөн оны арваннэгдүгээр сард Хятадын засгийн газар ямар ч шинэ аппликэйшн, түүний шинэчлэлтийг нэвтрүүлэхдээ зохицуулах байгууллагаас урьдчилж зөвшөөрөл авч байх шаардлагыг Tencent компанид тавьж байв. Tencent нь Хятадын хамгийн түгээмэл аппликэйшн WeChat-аас эхлээд гар утасны маш олон тоглоомыг эзэмшдэг юм.
Эх сурвалж: Business Insider
