ОХУ-д хууль бусаар нэгтгэгдсэн Украины дөрвөн бүс нутагт дайны цагийн дэглэм тогтоох шийдвэрийг ерөнхийлөгч Путин өчигдөр гаргажээ.

Пүрэв гарагаас хэрэгжиж эхлэх энэ арга хэмжээний хүрээнд хууль хүчний байгууллагууд тухайн бүс нутагт нийгмийн дэг журам тогтоохдоо давуу эрх эдлэх юм.

Оросын парламент Донецк, Луганск, Херсон, Запорожье мужуудад дайны цагийн дэглэм тогтоох Путиний шийдвэрийг тэр дор нь дэмжжээ.

Шийдвэрийн хүрээнд иргэдийн зорчих хөдөлгөөнийг хязгаарлах, олноор цугларахыг хориглох, хэвлэл мэдээлэл, сошиал сүлжээнд хяналт тогтоох, хууль хүчний байгууллагуудад илүү их эрх мэдэл өгөх төлөвтэй байна.

“Оросын аюулгүй байдал, амар амгалан ирээдүй, ард түмнийг хамгаалах асар том ажлуудыг шийдвэрлэхээр бид ажиллаж байна. Фронтын шугамд тулалдаж байгаа, тулаанд явахаар сургалтын талбайд бэлтгэгдэж байгаа хүн бүр манай аугаа том улс орон, эв нэгдэлтэй ард түмнийг хамгаалах гэж байгаагаа сайтар ойлгож байх ёстой” гэж ОХУ-ын үндэсний аюулгүй байдлын зөвлөлийн хуралдааны эхэнд Путин хэлжээ.

Путин бас Оросын баруун хэсэг, Москва, Санкт-Петербург хотын орон нутгийн удирдлагуудад онцгой эрх мэдэл олгохоор болсноо мэдэгдсэн ч энэ талаараа тодорхой мэдээлэл өгөөгүй байна.

Сүүлд Кремлийн хэвлэлийн төлөөлөгч Путиний шийдвэрт Оросын хилийг хаах асуудал багтаагүйг баталжээ.

Украины эзлэгдсэн бүс нутгуудаас нийтдээ таван сая хүнийг ОХУ руу нүүлгэн шилжүүлэхээр болсон байна.

“Донбасс болон Украины зүүн өмнөд бүс нутгаас нийтдээ таван сая орчим иргэнийг ОХУ-д нүүлгэн шилжүүлнэ” гэж Оросын үндэсний аюулгүй байдлын зөвлөлийн нарийн бичгийн дарга Николай Патрушев сүүлд мэдэгдсэн юм.

Ийм тооны хүмүүсийг ямар хугацаанд нүүлгэх болон хэчнээн нь ОХУ-д ирээд байгаа талаар тэр дэлгэрүүлээгүй байна.

Тэдгээр иргэдийн байрлах орон байр, хүнсний хангамжид тусгайлан анхаарал тавьж, аюулгүй байдал хангагдсан үед буцааж төрөлх нутагт нь шилжүүлэхийг Патрушев амлажээ.

Лхагва гарагт Украины өмнөд бүсийн Херсон мужийн иргэдийг болон тус мужийн Москвагаас томилогдсон орон нутгийн албан хаагчдыг ОХУ руу нүүлгэх ажиллагаа эхэлсэн юм.

Днепр мөрнийг гатлах хөлөг онгоцонд суухаар урт дараалалд зогсож буй хүмүүсийн зураг, дүрс бичлэг сошиал сүлжээнд өргөн тархаад байна.

Эх сурвалж: Associated Press