Эрүүл мэндийн байгууллагуудаар үйлчлүүлж буй иргэдээс автомашины зогсоол, төлбөртэй холбоотой санал гомдол тасрахгүй байгааг ЭМЯ-ны Төрийн нарийн бичгийн дарга Ц.Эрдэмбилэг хэллээ.
Тэрбээр нийслэлд зургаан эрүүл мэндийн байгууллага гадаах зогсоолдоо төлбөр авдаггүй. Харин НИТХ-ын тогтоолын дагуу гаднах зогсоолоос нь төлбөр авдаг зургаан байгууллага зогсоолын төлбөрөөс ямар нэг хувь авдаггүй хэмээн онцолсон юм.
Үргэлжлүүлэн "Эмнэлгийн зогсоол нь Эрүүл мэндийн яамны эрхлэх асуудал бол биш. Гэхдээ бид асуудлуудыг тухай бүрд нь Нийслэлийн Эрүүл мэндийн газраар дамжуулан тавьж байгаа.
Зарим эмнэлгийн тухайд гаднах зогсоолоос гарахдаа тухайн эмнэлэгт үзүүлсэн баримтаа үзүүлээд портоор нь төлбөр төлөхгүйгээр гарч байгаа.
Харин зарим эмнэлгийн зогсоолоос төлбөр авах шаардлага болсон. Яагаад гэвэл зэргэлдээ оршиж байгаа орон сууцных нь иргэд харьцангуй хяналт, камержуулалт сайтай газар автомашинаа тавьж хонуулах эсвэл байршуулах сонирхолтой байна. Тийм иргэдийн автомашинаа тавьж, яг эмнэлгээр үйлчлүүлэх гэж байгаа иргэдийн зогсоолыг эзэлчихдэг. Тиймээс иргэд зогсоолтой холбоотой гомдлыг ихэвчлэн эмнэлгийн удирдлагуудад тавьж байна.
Энэ асуудлыг шийдэхийн тулд олон талыг харах ёстой учраас бид хүсэлтүүдээ холбогдох байгууллагуудад өгөөд явж байгаа.
Өөрөөр хэлбэл, эрүүл мэндийн байгууллагын зүгээс яг эмнэлэгт үйлчлүүлсэн иргэд эмнэлгийн зогсоолынх нь төлбөрөөс чөлөөлөгдөнө. Үйлчлүүлээгүй буюу эргэлтээр ирсэн эсвэл зэргэлдээх орон сууцны иргэд зогсоолд нь автомашинаа байрлуулсан бол төлбөр авах нь зүйтэй гэж үзэж байгаа" гэсэн юм.
