Ням гарагт ОХУ-ын гадаад хэргийн сайд Сергей Лавров хэвлэлд ярихдаа Украины хямралыг АНУ-ын ерөнхийлөгч Жо Байден “шийдвэрлэж чадна” гэж найдаж байгаагаа илэрхийлжээ.

Ингэхдээ тэр 1962 оны Кубын цөмийн хямралыг АНУ, ЗХУ хоёр улсын удирдагчид хэрхэн шийдвэрлэж байсныг жишээ болгон дурдсан байна.

1962 оны хямралын тухай Оросын төв телевизийн хийсэн баримтат кинонд ярилцлага өгөхдөө Лавров өнөөдрийн Украины хямралын ижил төстэй болон ялгаатай талуудыг ярьжээ.

“Өнөөдрийн нөхцөл байдал хэн хэрхэн тушаал өгч болохыг илүү ойлгох боломжийг ерөнхийлөгч Жо Байденд олгоно гэдэгт найдаж байна. Нөхцөл байдал маш их сэтгэл түгшээж байна. Ялгаа нь гэвэл тэртээ 1962 онд Хрущев, Кеннеди нар үүрэг хариуцлагаа ухаарч, мэргэн ухаан гаргаж чадсан. Харин өнөөдөр Вашингтон болон түүний холбоотнуудаас бид ийм зүйл олж харахгүй байна” гэж Лавров ярьсан байна.

Кубын хувьсгалыг дэмжих зорилготой Карибын тэнгист ирсэн Зөвлөлтийн шумбагч хөлгийг АНУ-ын тэнгисийн флот бүсэлсний хариуд 1962 оны аравдугаар сарын 27-ны өдөр Зөвлөлтийн хөлгийн ахмад төвөөсөө цөмийн зэвсэг хэрэглэх зөвшөөрөл хүсэж байжээ.

Тухайн өдрийн орой Куба дахь пуужингуудаа Зөвлөлтийн тал буцааж татсаны хариуд Турк дахь пуужингуудаа АНУ буцааж татах нууц тохиролцоог ерөнхийлөгч Кеннеди Хрущевтай хийсний үр дүнд дэлхий ертөнц цөмийн дайны аюулаас аврагдаж байсан юм.

Өнөөдөр хүйтэн дайны дараах Европ тивд НАТО-гийн хүч нөлөө нэмэгдсэн нь Оросын ашиг сонирхолд аюул занал учруулж байгааг ерөнхийлөгч Владимир Путин илэрхийлдэг.

Харин АНУ болон түүний Европын холбоотнууд Украины газар нутгийг эзлэн түрэмгийлсэн үйлдэл нь Москвагийн санаа зовнилыг зөвтгөх шалтгаан биш гэж үзэж байна.

Одоогийн нөхцөл байдалд Орос улс юу хийж чадахыг асуухад Лавров “Орос улс болон ерөнхийлөгч Путин хэлэлцээ хийхэд бэлэн байгаа нь бидний хийж чадах зүйл юм” гэж хариулжээ.

Эх сурвалж: Reuters