Ням гарагт болсон Бразилын ерөнхийлөгчийн сонгуулийн сүүлчийн шатны санал хураалтад тус улсын ерөнхийлөгч асан, зүүний үзэлт улстөрч Луиз Инасио Лула да Силва ялалт байгууллаа.
Ингэснээр одоогийн ерөнхийлөгч, барууны үзэлт Жайр Болсонаругийн засаглал өндөрлөж байна.
Саналын хуудаснуудын 99 хувийг тоолсны дараах байдлаар Силва 50.8, Болсонару 49.1 хувийн санал авсан нь тодорхой болжээ.
Үйлдвэрийн ажилчин асан Лула одоогоос яг 20 жилийн өмнө Бразилын анхны ажилчин ангиас гаралтай ерөнхийлөгч болж байв.
Латин Америкийн зүүний үзэлтэй удирдагчид Силвад баяр хүргэсээр байна.
Колумбын ерөнхийлөгч Густаво Петро “Viva Silva” гэж твиттер хуудсандаа бичсэн бол Аргентины ерөнхийлөгч Альберто Фернандез “Латин Америкийн түүхэнд шинэ эрин эхэллээ” гэж жиргэжээ.
Мексикийн ерөнхийлөгч Андре Мануэл Лопез Обрадор сонгуулийн үр дүнг “тэгш эрх, хүнлэг ёсны ялалт” гэж дүгнэжээ.
2003-2010 оны хооронд Бразилын ерөнхийлөгчөөр ажилласныхаа дараа улс төр, авлигын олон хэрэгт холбогдож, бараг хоёр жил шоронд хоригдож, дахин сонгуульд өрсөлдөх эрхээ хасуулж байсан 77 настай Лула ийнхүү улс төрд дахин ирж байна.
217 сая хүн амтай, газар нутгийн хэмжээгээр дэлхийд тавдугаарт, хүн амын хэмжээгээр долоо дугаарт эрэмбэлэгддэг Бразилын улс төрийн амьдрал бүс нутагтаа төдийгүй дэлхий дахинд чухал нөлөөтэй юм.
Эх сурвалж: The Guardian
