Аж, ахуй нэгжийн цахилгааны үнийн тарифыг ирэх сарын 1 буюу маргаашаас /2022.11.01/ нэмнэ гэж Эрчим хүчний сайд Б.Чойжилсүрэн сайд мэдэгдээд байсан билээ.

Тэрбээр "Энэ жилийн гүйцэтгэлээр Эрчим хүчний салбар 200 гаруй тэрбум төгрөгийн алдагдалтай ажиллахаар байна. Гарцаагүй үнэ тарифыг нэмэхээс өөр гарцгүй болсон. Эсвэл ирэх жилийн төсөвт 300-400 тэрбум орчим төгрөгийн татаас суулгаж, татаасаар амьдрах хоёр сонголттой байна. Энэ байдлаараа цаашдаа явбал энэ өвлийг давах байх.

Цаашдаа тогтой байх уу, үгүй юу гэдэг асуудал үүсч байна. Нийгмийн даатгалын шимтгэлийг төлж чадахгүйгээс энэ салбарын ажилчид дийлэнх нь төрийн үйлчилгээ авч чадахгүй болчихсон байна. Цар тахлын үед эрчим хүчний салбар байж болох бүхий л нөөцөө шавхаад дууссан.

Энэ оны арваннэгдүгээр сарын 1-нээс ААН-ийн хувьд 5,000 кВт хүртэл хэрэглээтэй бол 14 хувь, үүнээс дээш хэрэглээтэй бол 28 хувиар төлбөрийг нэмэгдүүлж тооцно. 2019 онтой харьцуулахад эрчим хүчний салбарын өртөг 28 хувиар нэмэгдсэн.

Эхний ээлжид айл өрхүүдийн эрчим хүчний үнийг нэмэгдүүлэхгүй. Харин уул уурхайн компаниуд, банк, үүрэн телефоны операторууд, архи үйлдвэрлэгчид, криптовалют үйлдвэрлэгч гэх мэт санхүүгийн ачааллыг дааж чадах байгууллагууд 200 мянган кВт хүртэл 28 хувь, үүнээс дээш хэрэглээнд нь 38 хувийн нэмэгдэл тооцох талаар Сангийн сайдтай ярилцсан ” гэсэн юм.

Hardnews.mn