Сүүлийн хоёр сар гаруй хугацаанд Оросын арми Иранаас худалдаж авсан өөрийгөө золиослогч (камиказе) дронуудыг Украины амин чухал дэд бүтцүүдийг устгахад ашиглаж байгаа.
Хэдийгээр Өрнөдийн тагнуулын албад эдгээр дронуудыг Иранд үйлдвэрлэснийг баталж байгаа ч үүнийг Москва, Тегераны эрх баригчид няцаасаар байна.
Тэгвэл Institute for Science and International Security (ISIS) хүрээлэнгийн судлаачид Оросын армийн Украинд ашиглаж байгаа дроныг шинжлээд гарал үүслийг нь тогтоожээ.
Тэдний олж тогтоосноор Ираны дронуудыг Хятадын хуулбарласан Өрнөдийн технологи дээр үндэслэн бүтээсэн юм байна.
Тухайлбал Украинд түгээмэл ашиглагдаж буй Шахед-136 дроны хөдөлгүүрийг Хятадын Beijing MicroPilot Flight Control Systems компани үйлдвэрлэжээ. Ингэхдээ Германы Limbach Flugmotoren компанийн зохион бүтээсэн хөдөлгүүрийн дизайныг хуулбарласан байна.
Бас нэг дрон болох Шахед-131-ийн хөдөлгүүрийг Иранд үйлдвэрлэсэн ч мөн Beijing Micropilot Flight Control Systems компанийн хөдөлгүүрийг хуулбарласан байжээ.
Харин Хятадын компани уг хөдөлгүүрийн дизайныг Их Британийн үйлдвэрлэгчээс хуулбарласан нь тогтоогдсон байна.
“Иран улс Оросын армид нисгэгчгүй онгоц үйлдвэрлэж, нийлүүлэх боломжийг олгоход Хятад улс урьд нь төсөөлж байснаас илүү том үүрэг гүйцэтгэж байгаа нь эндээс харагдлаа. Хятадын компаниуд нисгэгчгүй онгоц үйлдвэрлэх Өрнөдийн технологийн хуулбарыг Иранд нийлүүлж байгаа нь тодорхой байна” гэж дээрх судалгааны тайланд дүгнэжээ.
Өрнөдийн технологийг Хятадын компаниуд ямар аргаар олж авсан нь тодорхойгүй байгааг ISIS хүрээлэнгийн судлаач Спэнсер Фарагассо ярьж байна.
Үүнээс гадна Иранаас Оросын армид нийлүүлсэн Шахед-136 болон Мохажер-6 дронуудад АНУ болон Европт үйлдвэрлэсэн эд ангиудыг шууд ашигласан байгааг тогтоожээ.
Өрнөдийн орнуудын засгийн газрууд технологи нь ямар замаар Ираны үйлдвэрлэгчдийн гарт орсныг мөрдөж тогтоох хэрэгтэйг Фарагассо анхааруулсан байна.
“Ираны худалдан авалтын сүлжээг олж илрүүлэх нь Өрнөдийн үйлдвэрлэгчидтэй хамтран ажиллахаас эхлэх боломжтой. Эндээс эрх баригчид худалдааны компаниуд, дистрибютерүүд, тээврийн компаниуд, Иранд нийлүүлэгчдийг, Ираны худалдан авагчдыг системтэйгээр илрүүлэх шаардлагатай” гэж тэр ярьжээ.
Эх сурвалж: Business Insider
