Эрчим хүчний хангамж бүрэн тасалдсан тохиолдолд нүүх бэлтгэлтэй байхыг Украины нийслэл Киев хотын захирагч оршин суугчдадаа анхааруулжээ.

Сүүлийн өдрүүдэд Оросын агаарын цохилтын улмаас Украин даяар олон сая хүн гэрэл цахилгаангүй, ундны усгүй нөхцөлд амьдарч байгаа.

Хэт ачаалал үүсэхээс сэргийлэх, засвар үйлчилгээ хийх зорилгоор эрчим хүчний тасалдал байнга гарч байна.

Украины эрчим хүчний дэд бүтцийн 40 орчим хувь Оросын агаарын цохилтод сүйрсэн тухай мэдээлж байгаа.

Ням гарагт телевизээр үг хэлэхдээ Киев хотын захирагч Виталий Кличко иргэний дэд бүтцийн байгууламжуудыг устгаж буй Оросын цэргийн ажиллагааг “терроризм”, “геноцид” гэж нэрлэсэн юм.

“Путинд украинчууд бид хэрэггүй. Зөвхөн хоосон газар нутаг нь хэрэгтэй байгаа” гэж тэр хэлжээ.

“Тийм учраас одоо өрнөж буй үйл явдлыг “геноцид” гэж нэрлэж болно. Тэр биднийг үхүүлж, хөлдөөж, зугтаалгаад газар нутгийг маань авахыг санаархаж байна” гэж Кличко ярьсан юм.

Хэдийгээр Киевийн удирдлагууд гэрэл цахилгаан, усны хангамжийг тасалдуулахгүйн төлөө бүхнийг хийж байгаа ч хамгийн муу тохиолдолд бэлтгэлтэй байх ёстойг тэр оршин суугчдадаа анхааруулсан байна.

Хэрвээ ирэх өвөл цахилгаан, усны хангамж бүрэн зогсвол хотоос гадна амьдардаг хамаатан садан, найз нөхдийндөө нүүж, толгой хоргодох бэлтгэлтэй байхыг Киев хотын гурван сая оршин суугчдад Кличко зөвлөжээ.

Тэрбээр онцгой тохиолдолд ашиглах 1,000 орчим нийтийн дулаан байрыг Киев хот даяар байгуулж, түлш, ус, хүнс нөөцлөх ажлыг зохион байгуулж байгаагаа энэ үеэр мэдээлсэн байна.

Эх сурвалж: BBC