Нүүрсний хулгайн талаар Хууль зүй, Дотоод хэргийн сайд Х.Нямбаатар мэдээллээ.
Тэрбээр "Сүүлийн үед АТГ, ЦЕГ-ын хамтарсан ажлын хэсэг хууль бусаар буюу бүртгэлгүйгээр хилээр нүүрс гаргаж байгаа хэргийг шалгаж байгаа. Үүнтэй холбоотойгоор олон хүний эрх ашиг хөндөгдөж байх шиг байна.
Өчигдөр "Страто" компанийн хамаарал бүхий хүн хүртэл олон нийтийн сүлжээнд Ерөнхий сайдад хандан "Үзэл бодлоо илэрхийлсэн залуучуудыг чам шиг хорьж цагдан, эрхийг нь хязгаарлахгүй" гэх агуулгатай нийтлэлүүдийг тавьж байна лээ.
Нүүрсний гэх олон холбогдогчтой хэргийн мөрдөн шалгах ажиллагаа удахгүй дуусгавар болж, шүүхэд шилжих байх.
Олон нийт хэвлэл мэдээллийн хэрэгслийг үзэж байгаа хүмүүс сонор соргог анхааралтай ажиглах ёстой. Шүүх дээр элдэв орон зай гарч, Хөгжлийн Банкны гэх мэт дуулиант хэргүүд удаашрах, хэн нэгэн шалгагдахгүй үлдэх вий. Мөрдөх байгууллагууд дээр дурдсан олон хүнд хамаарах хэргүүдийг бүхэлд нь шүүхэд шилжүүлэх ажил хийгдэж дуусаж байгаа. Араас нь нүүрсний хэрэг шилжинэ гэдгийг хэлье" гэв.
Нүүрсний хулгай гэх асуудлыг олон нийтийн сүлжээнд анх ил болгосон хүн нь тухайн үед Өмнөговь аймгаас сонгогдсон УИХ-ын гишүүн Л.Энхболд. Тэрбээр 2012-2013 оны хоорондох Google map ашиглан Эрдэнэс Тавантолгой, орон нутгийн Тавантолгой хоёрын ашигт малтмалын лицензийн заагийг тодорхойлдог мөргөцгийн хэмжээ ойролцоогоор тодорхой массштаб хэмжээтэй байсан бол 2016 онд Google map дээр харахад хэмжээ нь өөрчлөгдсөн гэдгийг хэлж УИХ-ын ажлын хэсэг газар дээр нь очиж ажиллаж байв.
Ажлын хэсгийн явцад орон нутгийн Тавантолгойгоос уулын ажлын хүндрэлтэй байдлаас шалтгаалан уг мөргөцгийг ашигласан гэдгийг ярьж, хуулийн байгууллагаар шалгагдаж байсан. Үүнээс хойш улсын хилээр гарч байгаа нүүрсний Монгол Улс, БНХАУ-ын гаалийн мэдээ зөрж ирсэн.
Шүгэл үлээгчийн мэдээлсний дагуу хуулийн байгууллага шалгаад тодорхой албан тушаалтнууд үгсэн хуйвалдаж, улсын хилээр нүүрс гаргаж байх үйлдлийг таслан зогсоож, тухайн хүмүүст эрүүгийн хэрэг үүсгэн шалгаж байгаа. Үүнээс гадна хэд хэдэн мэдээлэл хамт шалгагдаж байгааг тэрбээр хэллээ.
Мэдээллийг мөрдөн байцаалтын нууц гэдэг байдлаар хэвлэл мэдээллийнхнээс халхалдаг зүйлийг зогсоож, нээлттэй болговол хэрэг замхрахгүй, улстөржсөн, төөрөгдсөн мэдээлэл явахгүй байх талтай юм. Ажлын хэсэг хэргийн талаар мэдээлэл өгөөсэй гэв.
