Бямба гарагт Невада мужийн санал хураалтын дүн гарахад Ардчилсан намын Катерин Кортез Масто АНУ-ын сенатын гишүүнээр үргэлжлүүлэн ажиллахаар болж, Бүгд Найрамдах намын өрсөлдөгч Адам Лаксалтыг ялсан байна.
Ингэснээр ерөнхийлөгч Жо Байдены Ардчилсан нам АНУ-ын Конгрессын дээд танхим болох Сенатад нөлөөгөө тогтоож байна.
Баасан гарагт Аризона мужид мөн Ардчилсан намын сенатор Марк Келли ялалт байгуулаад байсан юм. Ингэснээр 100 суудалтай Сенатын танхимын 50 суудал Ардчилсан намд шилжиж байна.
Дэд ерөнхийлөгч Камала Харрисын саналыг нэмснээр тус нам Сенатын танхимд олонх болж байгаа юм.
Конгрессын 2022 оны завсрын сонгуулийн үр дүнд шинээр бүрэлдсэн Сенат ирэх оны нэгдүгээр сарын 3-ны өдөр тангараг өргөнө.
Ням гарагт АНУ-ын ерөнхийлөгч Жо Байден сонгуулийн үр дүнд сэтгэл хангалуун байгаагаа илэрхийлжээ.
Одоо Жоржиа мужид саналын хуудас тоолох ажиллагаа үргэлжилж байгаа. Хэрвээ энэ мужид ялалт байгуулбал Ардчилсан нам Сенатад 51 суудалтай болж, нөлөө нь улам нэмэгдэх юм.
Зүүн Өмнөд Азийн орнуудад хийж буй айлчлалынхаа хүрээнд Камбож улсад хүрэлцэн ирээд байгаа Байден сэтгүүлчидтэй уулзахдаа “Санал хураалтын үр дүнд гайхахгүй байгаагаа дахин хэлмээр байна. Би үнэхээр сэтгэл хангалуун байна. Энэ нь чанартай хүмүүсийг сонгуульд нэр дэвшүүлсний үр дүн юм” гэж хэлжээ.
Невада, Аризона мужуудад Ардчилсан намын нэр дэвшигчид ерөнхийлөгч асан Дональд Трампын дэмжиж гаргасан нэр дэвшигчдийг ялсан юм.
Хэдийгээр Бүгд Найрамдах нам Конгрессын доод танхим болох төлөөлөгчдийн танхимд цөөн суудлын илүүгээр ялах нь тодорхой болсон ч энэ удаагийн завсрын сонгуульд хангалттай өрсөлдөж чадаагүйн гол буруутнаар ерөнхийлөгч асан Дональд Трампыг тодруулаад байна.
Түүнийг ялах магадлал багатай нэр дэвшигчдийг өрсөлдүүлсэн гэж Бүгд Найрамдах намын зарим улс төрчид үзэж байгаа юм.
Завсрын сонгуулийн үр дүн 2024 онд ерөнхийлөгчийн сонгуульд гурав дахь удаагаа өрсөлдөхөөр бэлдэж буй Трампын нэр хүндэд сөргөөр нөлөөлөх нь тодорхой болж байна.
Эх сурвалж: Reuters