Украины талд урвасан Оросын хөлсний цэргийг цаазалж буйг харуулсан дүрс бичлэг Бямба гарагт “Gray Zone” нэртэй Телеграм хуудсанд нийтлэгдсэн юм.

Тус хуудас нь Оросын хувийн батлан хамгаалах компани Вагнер Групптэй ойр ажилладаг ажээ. “Өшөө авалтын алх” гарчигтай нийтлэгдсэн дүрс бичлэгт Украины талд урвасан Вагнер Группийн 55 настай хөлсний цэрэг Евгений Нужин гэгчийг цаазалж буйг харуулсан юм.

Тэрбээр есдүгээр сард Украины талд урвасан бөгөөд аравдугаар сарын 11-нд Киевээс хулгайлагдсан юм байна.

Бичлэгт Нужиний толгойг тоосгон ханатай хавсран лантуугаар хүчтэй цохин амийг нь бүрэлгэж буйг харуулжээ.

Энэ талаар Вагнер Группээс тодруулахад тус компанийг үүсгэн байгуулагч Евгений Пригожиний мэдэгдлийг нийтэлсэн байна.

“Путиний тогооч” хочтой Пригожин 2014 онд Вагнер Группийг үүсгэн байгуулсан нь сүүлд Ливи, Сири, Төв Африкийн Бүгд Найрамдах Улс, Мали, Украин зэрэг орнуудад Москвагийн эрх ашгийг хамгаалах үүрэгтэй байлдааны ажиллагаа явуулж байсан юм. Тэрбээр Вагнер Группийг үүсгэн байгуулснаа саяхан хүлээн зөвшөөрч байв.

Пригожиний мэдэгдэлд “Нужин ард түмнээсээ, журмын нөхдөөсөө санаатай урвасан урвагч юм” гээд уг бичлэгт “нохойд нохойн үхэл таарна” гэсэн гарчиг өгвөл зохихыг онцолжээ.

Тэрбээр бас Оросын иргэдийн зарим хэсгийг урвагчид гэж нэрлээд тэдэнд анхааруулга өгсөн байна.

“Зөвхөн автомат буугаа хаяад дайсны талд орсон хүнийг урвагч гэдэггүйг битгий март. Ард түмнээ боддоггүй зарим урвагчид албан тасалгаанд үүрлэж байна. Зарим нь төвийг сахисан орнууд руу хувийн онгоцоороо зугтацгааж байна. Тэд өнөөдрийн асуудалд хутгалдахгүйн тулд нисэж байгаа. Тэднийг ч бас урвагч гэж үзэх ёстой” гэж Пригожин мэдэгдэлдээ өгүүлжээ.

Украины дайн сунжирч, Оросын тал хохирол амсахын хэрээр Пригожиний нэр нөлөө Кремльд өсөж буй гэсэн яриа тараад байгаа. Зарим ажиглагчид түүнийг Орос оронд Сталинист маягийн дэглэм тогтоож болзошгүй хэмээн болгоомжлуулж байна.

Эх сурвалж: Reuters