Грект төвтэй Aylon Film Archives байгууллага нь 1940-1980-аад оны үед сонирхогчдын бүтээсэн дүрс бичлэгүүдийг цуглуулж, орчин үеийн видео форматад хувирган онлайн орчинд түгээх үйл ажиллагаа явуулдаг.
Тус байгууллагын архивт өчигдөр Монгол улстай холбоотой 1978 онд бүтээгдсэн гурван дүрс бичлэг нийтлэгджээ.
Дүрс бичлэгүүдийг тухайн үеийн Улаанбаатар хот дахь Их Британийн элчин сайдын яамны нэг ажилтан үйлдсэн бололтой. Их Британи, Умард Ирландын Нэгдсэн Хаант Улс нь 1963 онд Өрнөдийн орнуудаас хамгийн түрүүнд БНМАУ-тай дипломат харилцаа тогтоож байсан юм.
Нэг дүрс бичлэгт нь Улаанбаатар хот дахь Их Британийн элчин сайдын яамны байрны ойр орчмын байдлыг харуулжээ. Дараагийн бичлэгт Богд Хааны ордон музейн гадаад байдлыг харуулсан байна.
Гурав дахь бичлэгт Монголын хөдөө нутгаар Range Rover автомашинтай яваа элчин сайдын аяллыг харуулжээ.
Эх сурвалж: Aylon Film Archives
