Монголын Үндэсний Худалдаа Аж Үйлдвэрийн Танхим (МҮХАҮТ)-аас Монголд ирсэн ОХУ-ын жуулчдад тулгарч буй бэрхшээл, дэмжлэг тодруулах нэртэй судалгааг тус улсын жуулчдын нөхцөл байдал болон Монгол Улсад оруулж буй эдийн засгийн хувь нэмрийг тодорхойлох, цаашид манай улсад жуулчлахад шаардагдах дэмжлэгийг тодруулах зорилгоор хийжээ.

Ингэхдээ өнгөрсөн сарын 10-25 өдрүүдэд цахим болон ярилцлагын хэлбэрээр, манай улсад ирсэн ОХУ-ын нийт 426 жуулчныг хамруулсан байна.

Судалгаанд оролцогчдын

• 28.8 хувь нь аялал жуулчлалаар,
• 21.2 хувь нь Орос Украины мөргөлдөөнд оролцохоос татгалзан дүрвэж ирсэн,
• 18.3 хувь нь ажил хийх,
• 12 хувь нь суралцах зорилгоор ирсэн гэжээ.

Мөн тэдний 34.8 хувь нь англи хэлээр ярьдаг, ойлгодог, 42.1 хувь нь монгол хэлийг ямар нэг хэмжээнд мэддэг бол 24 хувь нь монгол хэл мэдэхгүй байна.

Түүнчлэн судалгаанд оролцогчдын дийлэнх нь буюу 97.9 хувь нь Улаанбаатар хотод байрлаж байгаа ба 40.2 хувь нь түрээсийн байранд, 39.8 хувь нь зочид буудалд, 15.5 хувь нь найз нөхөд, гэр бүлийнхээ гэрт амьдарч байгаагаа хэлжээ.

ОХУ-ын иргэд Монголд байх хугацаанд нэг өдөрт дунджаар 161.6 мянган төгрөгийн зардал гаргаж байна. Зардлыг нэр төрлөөр ангилан авч үзвэл нэг өдөрт байрлаж буй байрны түрээс болон зочид буудлын төлбөрт дунджаар 55.8 мянган төгрөг, хоолны зардалд дунджаар 39 мянган төгрөг, тээвэрт 12 орчим мянган төгрөгийг зарцуулж байгаа гэж дүгнэсэн байна.

Цаашид Монгол Улсад хэр удаан хугацаанд байх төлөвлөгөөтэй байгааг тодруулахад:

• 28.3 хувь нь нэг сараас дээш хугацаанд,
• 28.3 хувь нь Монгол Улсад байнга оршин суух төлөвлөгөөтэй байгаа
• 34 хувь нь тодорхой хэлж мэдэхгүй гэжээ. Мөн тухайн иргэдийн 82.6 хувь нь визээ сунгуулах хүсэлтэй байна.

Ажиллах нөхцөл байдал бүрдсэн тохиолдолд Монгол Улсад ажиллах сонирхолтой байгаа эсэхийг тодруулахад 90 орчим хувь нь ажиллана гэсэн бол 10 хувь нь ажиллах сонирхолгүй байна гэжээ.

Судалгаанд оролцогчдын 17 хувь нь инженер, 9.3 хувь нь мэдээллийн технологи, программ хангамжийн инженер, 8.3 хувь нь багш, тав орчим хувь нь эдийн засагч, хуульч, 4% хувь нь эмч мэргэжилтэй байна.

Түүнчлэн гадаадын иргэн ажиллуулахад компаниуд өндөр татвар төлдөг учир ажил олж хийх орлого олох, орон сууц түрээсийн төлбөр өндөр ба найдвартай түрээслэх байр олох, оршин суух зөвшөөрөл авах, виз сунгах зэрэг нь Монгол Улсад байрлах хугацаанд тулгарч буй хамгийн гол хүндрэлүүд гэжээ.

Монгол Улсад банкны данс нээлгэн карт авах, гүйлгээ хийхэд бэрхшээлтэй гэдгийг мөн хэлсэн байна.

Судалгааг бүтнээр нь ЭНДЭЭС харах боломжтой.