Үндэсний аюулгүй байдлын зөвлөлийн шуурхай хуралд оролцохоор ирж буй Польшийн батлан хамгаалахын сайд Мариуш Блащак
Оросын зэвсэгт хүчний хоёр пуужин өчигдөр Польш улсын хил орчмын тосгонд туссаны улмаас хоёр хүний амь үрэгджээ.
Тодруулбал Мягмар гарагийн үдээс хойш Пржеводов тосгоны үр тариа хатаах байгууламж пуужинд оногдсон болохыг Польшийн хэвлэл мэдээлсэн байна.
Энэ нь Украины дайн эхэлснээс хойш НАТО-гийн гишүүн орны нутаг дэвсгэрт Оросын зэвсгийн цохилт хүрсэн анхны тохиолдол юм.
Варшавын эрх баригчид өчигдөр үндэсний аюулгүй байдлын зөвлөлөө шуурхай хуралдуулсны дараа зэвсэгт хүчнээ өндөржүүлсэн бэлэн байдалд шилжүүлжээ.
Өчигдөр бас Оросын талаас Украины эрчим хүчний байгууламжуудад агаарын цохилт өгсний улмаас хөрш Молдов улсад цахилгааны томоохон тасалдал үүссэн байна. Молдов нь хэрэглэдэг цахилгаан эрчим хүчнийхээ нэлээд хувийг Украинаас импортолдог юм.
ОХУ-ын батлан хамгаалах яам өчигдөр Польшийн нутаг дэвсгэрт агаарын цохилт өгснөө няцааж, үүнийг Украины талын зохион байгуулсан өдөөн хатгалга гэж нэрлэжээ.
Харин Украины гадаад хэргийн яам үүнийг хариу няцаасан байна.
“Оросын тал Украины агаарын довтолгооноос хамгаалах пуужин Польшийн нутагт унасан гэх хуйвалдааны онол зохиож байна. Энэ бол худал мэдээлэл. Оросын суртал нэвтрүүлэгт итгэх хэрэггүй” гэж тус улсын гадаад хэргийн сайд Дмитро Кулеба твиттер хуудсандаа бичжээ.
Мягмар гарагт ОХУ-ын зэвсэгт хүчин Украины олон хотод агаарын хүчтэй цохилт өгсөн юм.
Энэ үеэр хамгийн багадаа нэг хүн алагдаж, өргөн хүрээнд эрчим хүчний тасалдал үүссэн байна. Киевийн эрх баригчид Оросын талын энэ үйлдлийг бараг есөн сар үргэлжилж буй Украины дайны хамгийн том агаарын ажиллагаа гэж тодорхойлжээ.
Украины ерөнхийлөгч Володимир Зеленский өчигдөр Оросын талаас нийт 85 пуужин харвасны ихэнх нь тус улсын олон хотын эрчим хүчний байгууламжуудад туссан тухай мэдээлсэн байна.
Тэрбээр энэ үйлдлийг “Их 20-ын гишүүн орнуудын нүүрийг алгадсан” хэрэг гэж тодорхойлсон юм.
Энэ удаагийн агаарын цохилт Их 20-ын бүлгийн удирдагчид Индонезын Бали аралд чуулж байгаа цаг үетэй давхцаж байна.
Зеленский “Бид бүхнийг сэргээн босгохоор ажиллаж байна. Бид бүхнийг даван туулах болно” гэж мэдэгджээ.
Мягмар гарагийн агаарын цохилт нь Херсон хотыг Украины талд алдсантай холбоотой Кремлийн эрх баригчдын уур бухимдлын илрэл, өшөө авалт гэж ажиглагчид дүгнэж байна.
Эх сурвалж: AFP