Гэмт хэрэг үйлдээд Москва хотын ойролцоо шоронд ял эдэлж байсан иргэнийх нь цогцос Украины фронтоос олдсон тухай Африк тивийн Замби улсын гадаад хэргийн яам мэдээлжээ.
Замбийн иргэн 23 настай Лемехани Натан Ниренда ОХУ-ын нийслэл Москва хотын Инженер, Физикийн дээд сургуульд цөмийн инженерийн мэргэжлээр суралцаж байсан гэнэ.
2020 оны дөрөвдүгээр сард тэр гэмт хэрэг үйлдээд есөн жил, зургаан сарын хорих ял сонсож байсныг Замбийн гадаад хэргийн яам мэдээлжээ.
Харин өнгөрсөн долоо хоногт л Замбийн эрх баригчид шоронд хоригдож байсан иргэн нь Украины фронтод алагдсаныг мэдсэн байна.
Ниренда есдүгээр сарын 22-ны өдөр алагдсан бөгөөд түүний шарилыг эх оронд нь шилжүүлэхээр Оросын хилийн жижиг хотод өнөөдрийг хүртэл хадгалж байжээ.
Шоронд ял эдэлж байсан иргэн нь ямар замаар Украины дайнд оролцож яваад алагдсаныг мэдэхгүй байгаагаа Замбийн засгийн газар мэдэгдсэн байна.
Press Statement by Hon. Stanley K. Kakubo, M.P, Minister of Foreign Affairs and International Cooperation of the Republic of Zambia on the demise of a Zambian National in Ukraine. pic.twitter.com/Vi08CxGuVF
— Zambia Foreign Ministry (@ZambiaMFAIC) November 14, 2022
“Москвагийн шоронд ял эдэлж байсан Замбийн иргэн яагаад Украины фронтод дайчлагдаж, улмаар амиа алдсаныг яаралтай тодруулахаар Замбийн засгийн газар ОХУ-ын эрх баригчдад хандаад байна” гэж уг мэдэгдэлд өгүүлжээ.
Өмнө нь Оросын эрх баригчид шоронгийн хоригдлуудаа ялаас чөлөөлөх нөхцөлтэйгөөр Украины дайнд явуулж байгаа тухай мэдээ цацагдаж байсан. Гэхдээ хоригдож буй гадаадын иргэдийг дайчилсан тухай мэдээлэл огт сонсогдож байгаагүй юм.
Эх сурвалж: Business Insider