Энэ арваныг дуусахаас өмнө сансрын нисгэгчдийг саран дээр байнга ажиллаж, амьдардаг болгох төлөвлөгөөтэй байгаагаа NASA-гийн албаны хүн ярьжээ.

“Энэ арванд багтаад бид хүмүүсийг сарны гадарга дээр урт хугацаагаар байрлуулах боломжтой болно. Тэд амьдрах сууц, зорчих унаатай байх юм” гэж NASA-гийн Orion сарны хөлөг бүтээх хөтөлбөрийн тэргүүн Ховард Ху өчигдөр BBC сувгийн “Sunday with Laura Kuenssberg” нэвтрүүлэгт оролцохдоо ярьсан юм.

Тэрбээр сансрын гүнд аялах хөлгийг зохион бүтээх төслийг энэ оны хоёрдугаар сараас удирдаж эхэлжээ.

Өнгөрсөн долоо хоногийн Лхагва гарагт NASA-гийн саранд хүрэх зориулалттай, 98 метр урт Артемис пуужин анх удаагаа сансарт амжилттай хөөрсөн юм. Уг пуужинд Orion хөлөг тээвэрлэгдэж хөөрчээ.

Энэ удаа Orion хөлөг сансрын нисгэгчгүй, харин иж бүрэн өмсгөлтэй гурван ширхэг манекентай хамт хөөрсөн юм. Эдгээр манекен нь сансрын нисгэгчдэд аяллын үеэр үүсэх даралт, хүч зэрэг нөлөөг хэмжих зориулалттай мэдрэгчүүдээр бүрэн тоноглогдсон ажээ.

Artemis пуужин одоо сарнаас 134,000 км-ийн зайд аялж яваа.

Orion хөлөг энэ удаа сарны гадаргууд 100 орчим километрийн зайд ойртож, 64,000 км орчим зам туулсны дараа дэлхий рүү буцаж, ирэх сарын 11-ний өдөр Номхон далайн усанд буух юм.

Тус хөлөг 25 хоногийн аяллынхаа үеэр нийт 2 сая километр зам туулах ба энэ нь хүн төрөлхтний бүтээсэн хөлгүүдээс хамгийн урт зам туулсан нь болох гэнэ.

Artemis 1 аялал амжилттай болбол Artemis 2, Artemis 3 аяллууд залгах ба энэ хоёр аялал нь сансрын нисгэгчдийг саранд хүргэх болно.

Тухайлбал Artemis 2 нь сансрын нисгэгчдийг сарны тойрог замд хүргэх бол Artemis 3 нь 2026 онд хүмүүсийг саран дээр буулгах юм.

NASA хамгийн сүүлд 1972 оны арванхоёрдугаар сард Apollo 17 хөлгөөр сансрын нисгэгчдээ сарны гадаргууд буулгаж байжээ.

Эх сурвалж: The Guardian