fbpx BRT төслийг бодитоор явуулах нөхцөл бүрдсэн. Би Үндэсний хорооны даргын хувьд биечлэн анхаарал тавина
 
Ангилал
Улс төр Дэд онцлох
Огноо
Унших
4 минут 19 секунд

BRT төслийг бодитоор явуулах нөхцөл бүрдсэн. Би Үндэсний хорооны даргын хувьд биечлэн анхаарал тавина

BRT төслийг бодитоор явуулах нөхцөл бүрдэж байгаа гэдгийг Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар онцоллоо.

Тэрбээр өчигдөр мэдээлэл хийх үеэрээ "Нийтийн тээврээ шинэчлэхгүй бол уналтад ороод жолооч нь хомсдож, маршрут чиглэлдээ явж чадахгүй болоод байна. Энэ байдлыг өөрчилж, парк шинэчлэлт хийхгүй бол манай нийтийн тээврийн автобуснуудын 60 хувь нь 10-аас дээш жил болчихсон, заримынх нь ашиглалтын хугацаа дуусчихсан. Тухайлбал, 2009 оны цэнхэр "Daewoo" автобус одоо 13 дахь жилдээ явж байна.

Бид ирэх жилийн өдийд дахиад л толгойгоо маажиж, бие биеэ буруутган зүхсэн байдалтай байж болохгүй бөгөөд өнөөдөр замаа шууд барьчхаж чадахгүй учраас нийтийн тээврийн асуудал дээр анхаарах хэрэгтэй.

Удахгүй Түгжрэлийн эсрэг багц хуулийн төсөл оруулж ирэхээр бэлдэж байна. Зарим нь хуучин автомашин оруулж ирж байгааг шууд хоригло гэж байгаа. Ингэж хараахан болохгүй. Хамгийн шударга механизм бол эдийн засгийн зохицуулалт.

Дараа жил дахиад ийм байдал үүсгэхгүйн тулд ямартай ч эхлээд нийтийн тээврийн паркийг 80 хувь, чадвал 100 хувь шинэчлээд, ямар нэг коридор гаргаж ирэх жил амьсгаа авах ёстой.

Ирэх жилийн өвлөөс өмнө нийтийн тээврийн үйл ажиллагаа тогтворжсон буюу ая тухтай, иргэдэд таалагдсан байх ёстой. Энэ долоо хоногт би нийтийн тээврийн чиглэлээр төв хувийн хэвшлийн түншлэл ямар байж болох талаар судлах ажлын хэсэг байгуулна" гэв.

Түүнчлэн "Олон нийтэд хэлээгүй ч Засгийн газрын шийдвэр гарсан зүйлсэд BRT-ийг явуулах асуудал багтсан. Тодорхой хэмжээний хөрөнгийн эх үүсвэр нь гаднын зээл. Өөрөөр хэлбэл, BRT төслийг бодитоор явуулах нөхцөл бүрдэж байгаа. Би Үндэсний хорооны даргын хувьд биечлэн анхаарал тавиад BRT-ийг хөдөлгөе гэж байгаа.

BRT төслийн тухайд 100 гаруй сая доллар шаардлагатай. Гэхдээ одоогоор 50 сая долларын төслийн боломж нээгдэж байгаа. Энэ мөнгийг одоогоор шилжүүлж аваагүй ч ажлыг түргэтгэж байна. BRT-ийн төсөл яваад ирэхээр үүнд тааруулаад түгжрэлд ач холбогдолтой маршрут чиглэл гаргана.

Мөн хэл амтай байсан дүүжин тээврийн асуудал бий. Үүнд Францын Засгийн газар ч нэлээд анхаарал тавьж байгаа. Тохиролцсон энэ асуудлынхаа ядаж нэгдүгээр шугамыг ажилд нь оруулъя гэж бид Францын талтай уулзсан. Монголын өвлийн улирлын нөхцөлд бүх л шаардлагыг Францын технологи хангана гэж тэд хэлсэн. Ямартай ч эхний шугамаа хийгээд үзэхээр бүгд ойлгох байх.

Үнэндээ дүүжин тээвэр одоо гацаанд орчихсон, ТЭЗҮ-ээ ч бүрэн хийгээгүй буюу одоо л ТЭЗҮ-ийг нь хийлгээд явж байна. Энэ ажил хавраас идэвхэжнэ.

Түүнчлэн LRT төслийг нийслэл өөрөө боломжоороо урагшлуулах ёстой. LRT бол БНХАУ, ОХУ, Австрали гээд бүхий л хөгжилтэй орнуудад байдаг.

Мөн метроны асуудал дээр есөн жилийн өмнө ЖАЙКА-гийн хийсэн судалгаа байдаг. Тус судалгаагаар тухайн үед энэ нь 1.5 тэрбум долларын өртөгтэй болно гэж тооцоолсон байдаг. Харин одоо судалгаа тооцоог дахиж авч үзэх хэрэгтэй.

Миний хувьд метрог үгүйсгэдэггүй, хийх ёстой ажил гэж үздэг. Гэхдээ бид санхүүгийн нөхцөл байдлаа харвал ирэх жил гэхэд Гэрэг, Хуралдай бондын төлбөрийг төлөх ёстой. Үүнийг төлөхөд хэцүү байгаа энэ үед иргэдэд таалагдах гэж метро барих ёстой гэж хэлэхгүй" хэмээн ярьсан юм.

Чингис хааны суу алдар ба Их Монгол гүрний зөөлөн хүчний бодлого
Чингис хааны суу алдар ба Их Монгол гүрний зөөлөн хүчний бодлого
 
Энэ сарын 28-нд жирэмсэн эмэгтэй, 12 хүртэлх насны хүүхэдтэй эх, ганц бие эцгийг гэрээс нь ажиллуулахыг зөвлөлөө
Энэ сарын 28-нд жирэмсэн эмэгтэй, 12 хүртэлх насны хүүхэдтэй эх, ганц бие эцгийг гэрээс нь ажиллуулахыг зөвлөлөө
Сэтгэгдэл (4)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!

Шинэ мэдээ