Нүүрсний хулгайд холбогдогчдыг зарлаж, хариуцлага тооцохыг шаардсан иргэдийн жагсаал төв талбайд хоёр өдөр үргэлжилсэн. Үүнтэй холбоотойгоор Ерөнхий сайд Л.Оюун-Эрдэнэ мэдээлэл хийв.
Тэрбээр "Энэ асуудал дээр өмнө нь байгаагүй том ажлын хэсэг байгуулагдсан. Тиймээс том хэмжээний үр дүн гарах болов уу хэмээн харж байгаа. Яагаад гэвэл, манай хууль хяналтын байгууллагууд Хөгжлийн Банкны асуудалд том үр дүн гаргаж чадсан.
Оюутолгой, Эрдэнэтийн 49 зэрэг адармаатай асуудал дээр ч нугаралгүй хугаралгүй ажиллаж, үнэний талд тогтож чадсан. Иймээс нүүрстэй холбоотой асуудал эцэслэгдэн шийдвэрлэгдэнэ гэдэгт итгэлтэй байгаа. Мөн харилцан эрх зүйн туслалцаа авах талаар хэд хэдэн удаа Элчин сайд болон холбогдох албаны хүмүүстэй уулзлаа. Монгол, БНХАУ-ын прокурор хамтран ажиллах явц сайн түвшинд явж байна. Энэ асуудал шийдэгдэнэ.
Сандарч байгаа хүмүүст хандаж хэлье, энэ асуудал дээр ухрахгүй. Ямар нэгэн байдлаар гэмээ хаацайлах гэж энгийн залуучуудыг битгий турхир. Монгол Улсад эрх зүйт төр гэж байгаа бол хулгай хийсэн хүн мэдээж шийтгэгдэж л таарна" гэлээ.
Нүүрсний хулгайтай холбоотой асуудалд өмнө нь байгаагүй том ажлын хэсэг байгуулсан гэдгийг тэрбээр мэдээлэл хийх үеэрээ нэмж хэллээ.