Хөл бөмбөгийн ДАШТ-ий шөвгийн дөрвийн шатны эхний тоглолт өнөө шөнө Аргентин, Хорватын шигшээ багуудын хооронд болох гэж байна.
Хоёр багийн гол тоглогчид болох 35 настай Лионел Месси, 37 настай Лука Модрич нарын хувьд Катар 2022 сүүлчийн ДАШТ нь болох өндөр магадлалтай. Тэдний хэн нь ч дэлхийн аваргын алтан цомыг өргөж үзээгүй юм.
2014 оны ДАШТ-д Аргентины шигшээ баг Германд хожигдон аварга болох боломжоо алдсан бол 2018 онд Хорватын шигшээ Францын багт хожигдон мөнгөн медаль зүүж байжээ.
Үндэсний шигшээ баг нь өмнөх ДАШТ-үүдэд үзүүрлэхэд Месси, Модрич хоёр шилдэг тоглогчоор дараалан шалгарч байв.
Хувийн үзүүлэлтүүдийг нь харьцуулбал Месси клубийн хэмжээнд 853 тоглолтод оролцож, 701 гоол оруулсан бол үндэсний шигшээ багтайгаа 170 тоглолтод оролцож, 95 гоол оруулжээ.
Модрич клубийн хэмжээний 687 тоглолтод оролцон 75 гоол оруулж, Хорватын шигшээ багийн бүрэлдэхүүнтэй 160 тоглолтод оролцож, 23 гоол оруулсан байна.
Оны дэлхийн шилдэг хөл бөмбөгчинд олгодог “Ballon d’Or” шагналыг Месси долоон удаа, Модрич нэг удаа хүртэж байжээ.
Аргентин, Хорватын үндэсний шигшээ багууд өмнө нь хоёр удаа ДАШТ-д таарч байсан юм.
1998 оны ДАШТ-ий хэсгийн тоглолтод таарахдаа Аргентин 1:0 харьцаагаар, 2018 оны ДАШТ-ий хэсгийн тоглолтод таарахдаа Хорват 3:0 харьцаагаар тус тус хожиж байжээ.
Хорват улс Югославын бүрэлдэхүүнээс гарч, тусгаар тогтносноос хойш долоон ДАШТ-д оролцохдоо хоёр ба гуравдугаар байруудыг 2018 ба 1998 онуудад эзэлсэн нь хамгийн өндөр амжилт байв.
Харин Аргентины шигшээ баг 1978, 1986 онуудад хоёр удаа дэлхийн аварга болж байжээ.
Эх сурвалж: CNN