Энэ оны аравдугаар сард дэлхийн томоохон сошиал платформ болох Твиттерийг технологийн салбарын том бизнесмэн Илон Маск $44 тэрбумаар худалдаж авсан билээ.
Тэрбээр худалдаж авсан компанидаа бүрэн хяналт тогтоож, өнгөрсөн хугацаанд хэд хэдэн эргэлзээтэй шийдвэр гаргаж байв. Tesla, SpaceX зэрэг өөр хэд хэдэн компанийг удирддаг түүний шийдвэрүүд нэлээд хэл ам дагуулаад байгаа.
Өчигдөр Маск өөрийн твиттер хуудсанд нэгэн санал асуулга зохион байгуулжээ. Ингэхдээ тэр Твиттерийн гүйцэтгэх захирлын албан тушаалаас огцрох нь зөв эсэхийг өөрийн 122 сая дагагчаас асуусан байна. Санал асуулгын үр дүнг дагахаа тэр амлажээ.
Ингэхэд санал асуулгад 17.5 сая орчим хүн оролцсоноос 57.5 хувь нь Маскийг огцрох ёстой гэж үзсэн байна.
Санал асуулгыг эхлүүлэхдээ тэр “vox populi, vox dei” (олны дуу хоолой бол бурхны дуу хоолой юм) гэх латин хэлц үгийг эш татаж байв.
Эндээс харвал Маск санал асуулгын үр дүнг шууд дагах бололтой.
Зарим ажиглагчид түүнийг 24 цагийн дотор огцорч, Твиттерийг удирдах өөр хүнийг түр хугацаагаар томилох байх гэж үзэж байна.
Ням гарагт тэрбээр Катарт хөл бөмбөгийн ДАШТ-ий шигшээ тоглолтыг АНУ-ын ерөнхийлөгч асан Дональд Трампын хүргэн Жаред Кушнертай үзэж байгаа нь хэвлэлүүдийн дуранд өртөж байв.
Ийнхүү Твиттер компанид сүүлийн хоёр сарын хугацаанд үргэлжилсэн ороо бусгаа цаг үе өндөрлөх магадлалтай боллоо. Энэ хугацаанд Твиттерийн ажиллах хүчний тал орчим нь цомхотголд хамрагдаж, уламжлалт бизнес загвар нь өөрчлөгдөж байв.
Эх сурвалж: BBC
