Өмнөд Америк тивийн Перу улсын нийслэл Лима хотын ойролцоох ариун дагшин толгой дээр Лхагва гарагт тус улсын өнцөг булан бүрээс ирсэн 13 шилдэг бөө 2023 онд дэлхий дахинд ямар үйл явдлууд болохыг зөгнөжээ.
Бөө нарын төлгөнд Украины дайн дуусах, Умард Америкт байгалийн гамшгийн улмаас олон хүн амиа алдах, Бразилын шинэ ерөнхийлөгч Лулагийн бүрэн эрхийн хугацаа хүнд нөхцөл байдалд эхлэх зэрэг үйл явдлууд буусан гэнэ.
“Украины дайн наймдугаар сараас хэтрэхгүй дуусна” гэж бөө нарын нэг Клеофе Седано хэлсэн байна.
Гартаа дун бүрээ барьж, өнгө алагласан пончо өмссөн бөө Уолтер Аларкон ирэх онд Умард Америк тивд “олон байгалийн гамшиг болж, олон хүн үхнэ” гэж зөгнөжээ.
Өмнөд Америк тивийн хамгийн том улс Бразилын ерөнхийлөгчөөр Ням гарагаас ажиллаж эхлэх Лула Да Силвагийн хувьд “сонгуулийн үр дүнтэй санал нийлэхгүй байгаа өрсөлдөгчдөөс нь шалтгаалан бүрэн эрхийн хугацаа хэцүү хүнд байдалд эхлэх ч эцэстээ тогтворжиж, сайхан цаг ирнэ” гэж Аларкон бас ярьсан байна.
Лимагийн ойролцоох Сан Кристобал толгойд цугларсан бөө нар 2023 онд хүн төрөлхтөн амар амгалан байхыг хүсэн ерөөж, газар дэлхийн эзэн Пачамама эх дагина, нарны бурхан Тайта Инти нарт мөргөжээ.
Эх сурвалж: AFP
