ОХУ-ын батлан хамгаалах яам өчигдөр Краматорск хотын ойролцоо пуужингийн томоохон цохилт өгсний үр дүнд Украины армийн 600 гаруй цэргийг устгаснаа мэдэгджээ.

Үүнийгээ шинэ оны өмнөх өдөр Макеевка орчимд Украины арми Оросын олон тооны цэргийг устгасны хариу арга хэмжээ гэж тайлбарласан байна.

Харин Украины тал дээрх мэдээллийг эрс няцаажээ.

“Энэ бол Оросын ээлжит суртал нэвтрүүлэг. Манай тал ямар нэг хохирол амсаагүй” гэж Украины зэвсэгт хүчний хэвлэлийн төлөөлөгч Сергей Череватый мэдэгдсэн байна.

ОХУ-ын батлан хамгаалах яамны мэдээлснээр Краматорск хотын дунд сургуулийн хоёр барилгад Украины нийт 1,300 гаруй цэрэг хуарагнаж байсан гэнэ.

Тэдгээрийн нэг барилга пуужингийн довтолгоонд өртсөн гэжээ. Гэхдээ уг мэдээллээ батлах ямар нэг баримт үзүүлээгүй байна.

Өнгөрсөн оны сүүлчийн өдөр Донецкийн Макеевка дахь Оросын хуаранд Украины арми агаарын цохилт өгөх үеэр 400 орчим цэрэг алагдсан гэж Киевийн эрх баригчид мэдээлж байв.

Харин ОХУ-ын тал хохирлын хэмжээгээ 89 гэж мэдээлсэн юм.

Үнэн алдартны шашны зул сарын баярыг тохиолдуулан Оросын тал 36 цагийн хугацаатай галаа зогсоогоод байв.

Гал зогсоох хугацаа дөнгөж дуусмагц Оросын арми Украины хэд хэдэн хотод агаараас довтолсны нэг нь Краматорск хот байжээ.

Энэ үеэр тус хотын хоёр сургуулийн барилга, найман орон сууцны барилга, автомашины гараашнууд сүйдсэнийг хотын захирагч сошиал хуудсандаа мэдээлсэн байна.

Гэхдээ хүний амь хохирсон эсэх талаар мэдээлэл өгөөгүй юм.

Өчигдөр дайтагч талууд ээлжит солилцоогоо хэрэгжүүлж, харилцан 50, 50 олзны цэрэг солилцсон тухай мэдээлжээ.

Эх сурвалж: BBC