Apple компанийг үүсгэн байгуулагчдын нэг Стив Возняк өчигдөр CNBC сувгийн "Squawk Box" хөтөлбөрт оролцохдоо тэрбумтан Илон Маскийг шүүмжилжээ.
Возняк бол талийгаач Стив Жобсын хамт Apple компанийг үүсгэн байгуулалцсан хүн юм.
Тэрбээр Маскийг Жобстой адил “хүмүүсийг бараа бүтээгдэхүүндээ итгүүлж чаддаг, шашны удирдагч төрлийн хүн” гэж тодорхойлжээ.
“Би түүнийг шашны удирдагч шиг бусдыг өөртөө итгүүлж чадах авьяастай хүн гэж боддог. Энэ талаараа тэр Жобстой адилхан. Маш олон хүн тэдний ярьсан бүхэнд итгэдэг” гэж Возняк ярьсан байна.
Гэхдээ Маскийг Жобстой адилтгах зүйл үүнээс өөр байхгүй, бусдаар бол Маск Жобсын түвшний бизнесмэн биш гэж тэр дүгнэжээ.
Ингэхдээ Возняк өөрөө хүртэл Маскийн хэлсэн үгэнд итгэж, “луйвардуулсан” түүхээ ярьсан байна.
“Миний амьдрал үнэнч шударга байх зарчим дээр суурилдаг. Хүний ярьсан бүхэн үнэн байх ёстой. Худлаа ярьж болохгүй. Хэтрүүлж болохгүй. Үнэнийг нууж болохгүй. Харин Илон Маск болон Тесла компанийн үйл ажиллагааг харахаар энэ зарчим алдагддаг” гэж Возняк хэлжээ.
Тэрбээр 2016 онд Маскийн амлалтад итгээд Тесла автомашин худалдаж авч байснаа энэ үеэр дурссан байна.
Тухайн үед Маск бүтээгдэхүүнээ удахгүй бүрэн автомат жолоодлоготой болж, Америк даяар өөрөө аялдаг болно гэж амлаж байсан юм.
Өнгөрсөн хугацаанд Возняк хамгийн сүүлийн үеийн камер, мэдрэгч зэргээр автомашинаа нэмж тоноглоход нийт $50,000-ыг зарцуулжээ.
Гэсэн ч бүрэн автомат жолоодлоготой болж чадаагүй байна.
Сүүлдээ Возняк түүний ярианаас залхаж, итгэхээ больсон гэнэ. Бүр цахилгаан автомашиныг зах зээлд өргөн нэвтрүүлэх зорилгоор “хэтрүүлж ярьдаг байх” гэж зөвтгөхийг хичээх болжээ.
Сүүлийн жилүүдэд автомат жолоодлогын горимд явж байхдаа Тесла үйлдвэрийн автомашин осол гаргасан хэд хэдэн тохиолдол бүртгэгдээд байгаа. 2018 онд Тесла компани видео сурталчилгаандаа автомат жолоодлогын горим бодитой болсныг харуулж байв. Сүүлд Тесла худал сурталчилгаа явуулсан хэргээр шүүхэд дуудагдаж байжээ.
Энэ оны эхээр Ройтерс агентлаг дээрхтэй ижил өөр нэг видео сурталчилгааны зарим хэсэг “тавилттай, хуурамч” болохыг олж тогтоосноо мэдээлсэн юм.
Эх сурвалж: Business Insider
