АНУ-ын төрийн нарийн бичгийн дарга Энтони Блинкен энэ долоо хоногт хуучин Зөвлөлтийн бүрэлдэхүүнд байсан Төв Азийн орнуудын удирдагчидтай уулзахаар төлөвлөжээ.

Украины дайны нөлөөгөөр энэ бүс нутгийн орнуудын ОХУ-тай харилцах уламжлалт харилцаа өөрчлөгдөж байгаа гэж судлаачид үздэг.

Мягмар гарагт айлчлалаа эхлэх АНУ-ын топ дипломатч Казахстан, Узбекистанд саатахдаа Казахстаны нийслэл Астана хотод Зөвлөлтийн бүрэлдэхүүнд байсан таван “стан” улсын гадаад хэргийн сайд нартай уулзах юм.

ОХУ-ын нөлөө хүчтэй байдаг, сүүлийн жилүүдэд Хятад улсын нөлөө эрчимтэй нэмэгдэж байгаа энэ таван улсад Москва, Бээжингээс илүү “найдвартай түнш” болохоо харуулах нь АНУ-ын төрийн нарийн бичгийн даргын айлчлалын гол зорилго гэж ажиглагчид дүгнэж байна.

“Бидэнд эдийн засгийн оролцооны тал дээр тавих саналаас гадна үнэт зүйлсийн ач холбогдолтой санал бас байгаа” гэж АНУ-ын төрийн департаментын Өмнөд болон Төв Азийн асуудал хариуцсан дипломатч Дональд Лю сэтгүүлчидтэй уулзахдаа мэдэгджээ.

Дээрх таван улс өнгөрсөн долоо хоногт Украины асуудлаарх НҮБ-ын санал хураалтад оролцолгүй түдгэлзсэн юм.

“Эдгээр орнуудын удирдагчдад Оросоос хамаарлаа багасгах нууц хүсэл бий нь гарцаагүй. Орос улс аюул занал учруулж байгааг тэд ойлгодог ч газарзүйн байршлаасаа болоод тэдний хийж чадах зүйл бага, эдийн засгийн нөхцөл байдал нь ч тэдэнд сонголт өгөхгүй байна гэж би боддог. Тиймээс АНУ илүү санаачилгатай байж, эдгээр орнуудын удирдагчидтай газар нутаг дээр нь илүү ойр харилцах боломж байгаа гэж үзэж байна” гэж Питсбургийн их сургуулийн судлаач Женифер Брик Муртазашвили ярьжээ.

Төв Азийн таван улсаас ОХУ-тай хамгийн урт хуурай газраар хиллэдэг Казахстан улсын хувьд нөхцөл байдал хамгийн ээдрээтэй байгаа.

Тус улсын хойд хил дагуу орос гаралтай хүн ам олноор суудаг бөгөөд ОХУ-ын ерөнхийлөгч Владимир Путин тус улсын одоогийн хил хязгаарт эргэлзэж явдгаа нуудаггүй. Украинд өдөөсөн дайнаа Путин тус улс дахь орос хэлтэй хүн амыг хамгаалах зорилготой гэж зөвтгөдөг нь Казахстаны удирдагчдыг болгоомжлоход хүргэж байгаа юм.

Эх сурвалж: AFP