Пүрэв гарагт Аргентины гурав дахь том хот Росариод оршдог Юнико супермаркетад зэвсэгт этгээдүүд халджээ.

Уг супермаркетыг дэлхийн шилдэг хөл бөмбөгчдийн нэг Лионел Мессигийн гэргий Антонелла Роккузогийн гэр бүлийнхэн эзэмшдэг юм байна.

Өглөө эрт гарсан халдлагын үеэр хүний амь нас, эрүүл мэнд хохироогүй гэнэ. Гэхдээ яагаад Мессигийн гэр бүлийн эзэмшилд онцолж халдсан нь тодорхойгүй байгааг албаныхан мэдээлжээ.

Орон нутгийн цагдаагийн газрын өгсөн мэдээллээр мотоциклтэй хоёр этгээд Юнико супермаркетын нэг салбарын байр руу гал нээснийхээ дараа хатуу цаасан дээр “Месси, бид чамайг хүлээж байна. Хавкин өөрөө хар тамхины наймаачин тул чамайг хамгаалахгүй шүү” гэсэн бичиг үлдээсэн байна.

Нэр дурдагдсан Пабло Хавкин нь Росарио хотын захирагч юм.

Хавкин энэ явдлын дараа Росарио хотод өсөн нэмэгдэж буй хар тамхитай холбоотой гэмт хэргийн гаралтыг хязгаарлахад тусалж дэмжихгүй байгаа төв засгийн газрыг буруутгажээ.

Росарио нь нийслэл Буэнос-Айрес хотоос баруун хойд зүгт 300 км зайтай оршдог.

Лионел Мессигийн ахалсан Аргентины үндэсний шигшээ баг өнгөрсөн онд хөл бөмбөгийн дэлхийн аварга болсон нь тус улсын түүхэнд 36 жилийн дараа тохиосон том үйл явдал байв.

Тэрбээр ихэнх хугацааг гадаадад өнгөрөөдөг ч үе үе Росарио хотын зах дахь гэртээ ирдэг юм байна.

Эрх баригч Перонист эвслийн сөрөг хүчнээс томилогдсон хотын захирагч Хавкин өчигдрийн халдлагын ард гэмт хэргийн бүлэглэлүүдээс гадна эрх баригчид байж болзошгүй хэмээн сэжиглэж байгаагаа мэдэгджээ.

“Би бүгдэд эргэлзэж байна. Тэд дундаа биднийг хамгаалах үүрэгтэй хүмүүст” гэж тэр өчигдөр орон нутгийн радио сувгаар ярьсан байна.

Росарио хотын гэмт хэрэгтэй тэмцэхэд анхаарал хандуулахыг холбооны засгийн газрын холбогдох хүмүүстэй уулзахдаа хэд хэдэн удаа хүссэн ч хариу арга хэмжээ авахгүй байгааг Хавкин энэ үеэр шүүмжилжээ.

Эх сурвалж: Associated Press