Ямар нэг дааврын найрлагагүй жирэмслэлтээс хамгаалах эмийг дэлхийд анх удаа Их Британид эрэгтэй хүмүүс дээр туршиж эхэлжээ.
Туршилт амжилттай болбол жирэмслэлтээс хамгаалах нь зөвхөн эмэгтэйчүүдийн үүрэг биш болно гэж судлаачид үзэж байна.
Одоогоор эрчүүдэд зөвхөн бэлгэвч хэрэглэх болон үрийн сувгаа боолгох хоёрхон сонголт байдаг бол эмэгтэйчүүдэд бэлгэвч, эм, тарилга зэрэг олон төрлийн сонголт байдаг.
Эрэгтэйчүүдэд турших эм нь дааврын нэмэлтгүйгээрээ эмэгтэйчүүдийнхээс ялгаатай тул эрүүл мэндэд ямар нэг сөрөг нөлөөгүй гэнэ.
YCT-529 гэж нэрлэж буй туршилтын эм А витамины хүртээмжийг хаах замаар эр бэлгийн эс үүсэхээс сэргийлдэг юм байна.
90 орчим жилийн өмнөөс судлаачид А витамины дутагдал хулгана, харх, сармагчин зэрэг амьдыг үргүйдэлд хүргэдгийг мэддэг болжээ.
Уг эмийг үйлдвэрлэгч YourChoice Therapeutics компанийн мэргэжилтнүүд YCT-529 нь эмнэлзүйн өмнөх судалгаагаар “99 хувийн үр дүнтэй, 100 хувь буцаах боломжтой, ямар ч гаж нөлөөгүй” болохыг тогтоосон байна.
Нэгдүгээр шатны туршилтад Их Британид амьдардаг 16 эрэгтэй оролцож байгаа юм байна.
“Жирэмслэлтээс хамгаалах хамгийн сүүлийн шинэлэг арга нь 60 гаруй жилийн өмнө эмэгтэйчүүдэд зориулан бүтээсэн эм байлаа. Өнгөрсөн хугацаанд энэ эмийн гаж нөлөөг сайн мэддэг болсны хувьд дааврын бэлдмэлгүй эм хамгийн зөв сонголт юм. Тэгвэл өнөөдөр дэлхий нийтээр эрчүүдэд зориулсан эмийг хүлээж авахад бэлэн болж байна. А аминдэмийн төмсөг дэх нийлүүлэлтийн замыг дарангуйлах замаар жирэмслэлтээс сэргийлж болдог нь бараг 100 жилийн өмнө батлагдсан зүйл. YCT-529 эмийг хоёр долоо хоногийн турш хэрэглэхэд хулгана, сармагчин зэрэг амьтдын эр бэлгийн эсийн тоог 99 хувийн үр дүнтэй бууруулж байснаас гадна эмчилгээг зогсоосны дараа үр тогтоох чадвар бүрэн сэргэж байгаа нь харагдсан юм” гэж эмийг бүтээсэн Миннесотагийн их сургуулийн профессор Гунда Георг ярьжээ.
YouChoice Therapeutics компанийн үүсгэн байгуулагч, гүйцэтгэх захирал Акаш Бакши шинэ эм нь дааврыг бус, уургийг хаадгаараа онцлог болохыг хэлж байна.
“Жирэмслэлтээс сэргийлэх нь эрэгтэй, эмэгтэй хүмүүсийн хамтын үүрэг гэж үздэг эрчүүдэд энэ эм таалагдана гэж би бодож байна. Жирэмслэлтээс хамгаалах арга хэрэгслийн сонголт хомс байдал нь үүнийг зөвхөн эмэгтэйчүүдийн үүрэг гэх олон зуун дамжсан үзлийг бий болгосон. Тэгвэл энэ нь тийм биш бөгөөд маш сайн үр дүнтэй, аюулгүй хялбар, түр зуурын үйлчилгээтэй анхны дааврын бэлдмэлгүй эмийг бид бүтээлээ” гэж Бакши ярьжээ.
Эх сурвалж: DPA
