Өчигдөр буюу Лхагва гарагт Киргизстан улсын парламент тус улсын төрийн далбааны загварыг шинэчлэх хуулийг сүүлчийн хэлэлцүүлгээрээ баталжээ.
Ерөнхийлөгч Садыр Жапаровын санаачилсан хуулийн төслийн дагуу далбаанд дүрсэлсэн нарны цацрагийг долгиотсон биш, шулуун болгож зассан байна. Долгиолсон цацраг нь далбааны дүрслэлийг нар шиг биш, харин наранцэцэг шиг харагдуулж байсан тул ингэж өөрчилжээ.
Киргиз хэлээр наранцэцгийг “кункарама” гэдэг бөгөөд энэ нь бас “бусдаас хараат” гэсэн утгыг давхар илэрхийлдэг юм байна.
Дүрслэлийг нартай илүү адилхан болгохын тулд цацрагийг шулуун болгожээ.
Үүнээс гадна далбааны суурь өнгийг өмнөхөөс нь арай илүү бараан өнгөтэй болгож, гэрийн тоононы хэгээс гурваар зэрэгцэж байсныг дөрөв болгосон байна.
Хуулийн төслийг аравдугаар сард анх танилцуулснаас хойш далбааны өөрчлөлтийг эсэргүүцсэн хэд хэдэн олон нийтийн арга хэмжээ Киргизстанд болж байв.
Одоо хуулийг ерөнхийлөгч Жапаров баталснаар хүчин төгөлдөр болох юм.
Киргизстаны төрийн далбааны голд гэрийн тооныг багтаасан 40 цацрагтай нарыг дүрсэлдэг. 40 цацраг нь анх Монголын түрэмгийллийн эсрэг тэмцэлд нэгдсэн Киргизийн 40 овгийг бэлэгддэг байна.
Одоогийн төрийн далбааны загварыг 1992 оны гуравдугаар сарын 3-нд тус улс тусгаар тогтнолоо зарласны дараа байгуулагдсан анхны парламент баталж байжээ.
Эх сурвалж: Radio Free Europe
