Монголын сагсан бөмбөгийн дээд лигийн энэ улирлын аваргын төлөөх финалын цуврал өнөөдөр/2025.04.21/ эхэлсэн. Цувралын эхний тоглолтод Бишрэлт Металл баг аваргаа хамгаалагч Хасын Хүлэгүүдийг 85-82 гэсэн харьцаатай хожиж, эхний ялалтаа байгуулав. Гэхдээ тоглолтын гол үйл явдал нэгдүгээр үеийн төгсгөлд болсон гэхэд хилсдэхгүй. Нэгдүгээр үеийн цаг дууссаны дараа Бишрэлт Металлын Девон Скоттын зүгээс биеэ барилгүй, шатаж Хасын Хүлэгүүд багийн А.Азбаяр дээр зүй бус спортын бус үйлдэл гарган түүний ар дагз руу цохисон билээ. Улмаар А.Азбаяр талбайн голд унаж, хэсэгтээ босоогүй.

Тэгвэл түүний биеийн байдлаар талаар аав н.Алтангэрэлээс нь тодруулахад "Одоогийн байдлаар толгой нь хүчтэй өвдсөн, нүд харанхуйлсан, дотор муухайрсан байдалтай байна. Тоглолтыг орхин шууд гэмтлийн эмнэлэг рүү ирж, компьютер томографийн шинжилгээ өгөөд хариугаа хүлээж байна. Хоёр цагийн дараа хариу нь гарна гэсэн. Эмч нарын хэлснээр дагз руугаа хүчтэй цохиулсан учир тархины доргилт авсан, хүчтэй цохиулсан учир дотуураа гэмтсэн байх гэх анхны онош тавиад байна. Шинжилгээний хариуг л хүлээж байна. Бишрэлт Металл болон Девон Скоттын зүгээс холбогдож, уучлалт гуйгаагүй" гэлээ.

Одоогийн байдлаар Монголын сагсан бөмбөгийн холбооноос дээрх үйл явдалтай холбогдуулан албан ёсны шийтгэл болон мэдэгдлийг хийгээгүй байна. Өнгөрсөн жил Т.Мэндбаярыг талбай дээр авч шидсэн Бишрэлт Металлын Силлаг хоёр тоглолт өнжүүлэх шийтгэл оноож байв. Харин энэ удаагийнх үүнээс илүү ноцтой тул шийтгэл хатуу байх ёстой гэж сагсан бөмбөг сонирхогчид үзэж байна.

Девон Скоттын хувьд плей-оффын нэгдүгээр шатанд Завхан Бродерс багийн залуу тоглогч Б.Барсболдыг хүчтэй түлхэж унагаан спортын бус үйлдэл гаргаж байв. Үүний улмаас талбайгаас хөөгдөж байсан. Харин плей-оффын хоёрдугаар шатанд Эйпсийн фанатуудтай зүй бусаар харьцаж, сануулга авч байсан удаатай.