Түүний сүүлийн жилүүдэд тайзнаа бүтээж буй дүрээс "Амьдрахуй"-н Жя Жэн, "1984" жүжгийн Жулияг энэхүү бичвэртээ онцолж байна. М.Батболд найруулагч тэр хоёрын хамтрал "Гэм зэм"-ийн улсын яллагчийн дүрээс эхэлсэн. Д.Ганцэцэг жүжигчний ур чадвар тайзнаа асан дүрэлзэж, үзэгчдийг байлдан дагуулж, найруулагчаас ямар ч дүр оноосон тодхон бүтээчихдэгийг бид мэдэх билээ.

Тиймдээ ч үзэгчдийн сэтгэлд баян хангалуун амьдралтай ч хайрласан хайрандаа эцсээ хүртэл үнэнч байж, зовлонг нь хуваалцаж, зарим үед бүр түүнээс ч илүү шаналж, зовж, турж эцэж, өвдсөн Жя Жэн, харгис дээрэнгүй, байнгын хараандаа байлгадаг нийгэмдээ зохицож, тэдний шаардлагыг үг дуугүй биелүүлдэг хэр нь дотооддоо хүнийг хайрлах зүрх сэтгэл, эрх чөлөөгөө гээгээгүй Жулиягийн дүрийг амьдруулж чадсан. Хэрвээ би "Амьдрахуй"-н Жя Жэний оронд байсан бол амьдралд тохиолдох тэр олон зовлонг тэсэж туулж чадахгүй зугатах байсан байх. Гэсэн ч тэр бүтэлгүй фу гүйд эцсээ хүртэл хань болж, үр хүүхдүүдээ өсгөж, бас алдаж, хүгд хүчир ажлын нугачаанд хөлгүй шахам болсон. Тэглээ гээд энэ амьдралдаа огтхон ч харамсаагүйгээ жүжгийн төгсгөлд хэлдэг.

Гурван цаг орчмын энэ жүжигт уйлж, дуулж, гүйж, алхаж, бачууран орилж, сандран мэгдсэн Жя Жэний дүрийг тэр торохгүйгээр даван гарч, хэчнээн дархлагдсан уран бүтээлч гэдгээ харуулж чадсан. Амьдрал өөрөө яг Жя Жэний дүр шиг хүнийг уйлуулж, дуулуулж, унагаж, босгож, орилуулж, ойлгуулдаг. Амьд явна гэдэг тэр бүх мэдрэмжийг хүн мэдэрч, басхүү бусдад өгөхийн нэр гэдгийг түүний энэ дүр бидэнд харуулдаг. Тиймдээ ч тэр "Амьдрал бол будаа, тос, давс, цай, цуу, түлээ. Түлээ галын ундарга, будаа өлсөж цангахгүй байхын эхлэл, тос, давс цай, цуу бол амьдралын амт. Үүнээс илүү амьдралын амт надад хэрэггүй, аав аа. Амьдрал амттай байх хэрэгтэй" гэж хэлдэг биз ээ.

Харин "1984" жүжгийн Жулияг өчигдөрхөн дахиад үзлээ. Нэг л хүнийг шүтэхийн төлөө нийгмээрээ хөдөлдөг дарангуйлал дүүрэн хатуу нийгмийн хүн байна гэдэг, тэдний аймшигт дүрэм журмыг дагаж мөрдөж амьдарна гэдэг хэчнээн зүдрэлтэй, уйлмаар хувь тавилан болохыг Жулия бие, сэтгэлээрээ амсаж яваа эмэгтэй. Гэсэн ч хайрлан дурлах зүрх сэтгэл нь хэвээр, сайхныг олж харах, мэдрэх ухаан бодол нь саруул болохоор бас ч гэж учиртай. Түүнийхээ хүчинд амьдралдаа багахан ч болов жаргалыг амсдаг. Мэдээж тэр бүхнийхээ гороор бүр ч хатуу шийтгэлд унаж, эцэст нь гөлөрсөн хүн болоод л дуусдаг. Өнөө инээд хөөр, цог золбоо болсон, уярал нулимстай Жулияг хормын төдийд л мөс шиг хүйтэн цэвдэг нэгэн болгож байгааг харах адилхан эмэгтэй хүний хувьд хэчнээн зүрх шимшрэм байв.

Ийм хүнд дүрийг, харгис хорон сэтгэхүйн цагдаагийн дүр тэр ялгаагүй гурван цаг орчим бүтээлээ. Тайзнаа тэр муухай харж, аймшигтайгаар чанга орилж, тэгснээ дурлаж, хайрлаж, сандарч, жаргалтай хором мөчүүдийг өнгөрөөж, харханд хазуулж, хамгаа соруулсан. Ингэж энэ дүрээр ч ялгаагүй олон мэдрэмжид хувирч, өөрийгөө зуун хувь дайчлан тоглолоо. Үнэхээр тулгаж, гүйцээж, бүр нэг автуулж, үзэн ядуулж, бас хайрлатал дүрээ бүтээлээ. Номын хуудаснаас л төсөөлөн боддог, ийм нэг эмэгтэйчүүд байдаг болов уу гэж санасан эл эмэгтэй дүрүүдийг тэр тайзнаа амилуулж, бидний зүрх сэтгэлд хоногшуулж чадлаа. Одоо Д.Ганцэцэг жүжигчнийг харах бүрд өөр олон дүрээс нь гадна "Амьдрахуй"-н Жя Жэн, "1984" жүжгийн Жулияг санах нь. Тэд үргэлж бидэнтэй хамт байх нь.