Хэдэн өдрийн өмнө болсон И-спортын “Esports World Cup 2025” тэмцээнд манай улсын “The Mongolz” баг Counter strike төрлөөр дэлхийн шилдгүүдийг хожиж анхны том тэмцээндээ түрүүлсэн. Энэ үйл явдал нь тэднийг хүндэлдэг, хайрладаг фэнүүддээ барьсан хамгийн том бэлэг болсон юм.
Тус тэмцээнд гол үүргийг гүйцэтгэж шилдэг тоглогч буюу MVP-ээр шалгарсан Techno4k нэрээрээ танигдсан М.Содбаярыг “Зууны мэдээ” сонин энэ Амжилтын эзэн буландаа онцолж байна.
М.Содбаяр “MESA League 2021” болон Азийн бүсийн тэмцээнүүдэд “The Mongolz” багийн хамт түрүүлж, олон улсын тавцанд эх орныхоо нэрийг дуурсгасан билээ.
Багийн “амин сүнс” тоглогч М.Содбаярын цахим спортын замнал хэдэн жилийн өмнөөс эхэлсэн байдаг. Тэрээр бага наснаасаа л Counter-Strike цувралд дуртай болж, хоббигоо амжилт болгон хувиргасан нь өдгөө олон улсын тэмцээнд Монголын төлөөлөл болон өрсөлдөх хэмжээнд хүргэсэн юм.
Сүүлийн жилүүдэд олон улсын томоохон тэмцээнүүдэд Монголын багтайгаа амжилттай оролцсоор ирсэн билээ. Түүний хурд, тоглолтын стратеги, багийн ажиллагаанд гаргасан хувь нэмэр нь түүнийг eSports-ийн шинэ үеийн манлайлагчийн нэг болгож байна.
2020 онд “Checkmate” багт анх тоглож эхэлснээсээ хойш хурдтай өсч, 2022 онд IHC Esports-д элссэнээр олон улсын тавцанд хүчтэй тоглогчийн нэг болсон юм. Тэрээр 2023 оноос The MongolZ багийн бүрэлдэхүүнд тоглож эхэлснээр багийн “амин сүнс” болсон. Түүний хурдтай шийдвэр, стратеги болон эр зоригтой тоглолт нь Монголын багийг дэлхийн шилдэг багуудтай өрсөлдөх түвшинд гаргаж байна.
М.Содбаяр өмнө нь өгсөн ярилцлагадаа “Монгол залуусын тоглолтын түвшин аль ч орны тоглогчдоос дутахааргүй болсон. Гагцхүү бидэнд илүү олон боломж, дэмжлэг хэрэгтэй. Тийм боломж гарвал бид дэлхийн шилдгүүдтэй мөр зэрэгцэн тоглоно гэдэгт итгэдэг” хэмээн хэлсэн байдаг. Түүний энэ үг зөвхөн хувь тоглогчийн мөрөөдөл бус, бүхэл бүтэн Монголын цахим спортын ирээдүйг илэрхийлж байгаа нь тодорхой.
Дэлхийн багаас “айхгүй” гэдгээ нотлож, өсвөр насаасаа компьютерийн хойно сууж, 20 насандаа мэргэжлийн түвшинд тоглон дэлхийн “Big Event”-ийн MVP хүртсэн тоглогч бол Techno4k.
Шилдэг тоглогч болсныхоо дараа “Энэ зөвхөн эхлэл. Үнэндээ би өөрийнхөө хийх ёстой зүйлийг хийж, MVP болсондоо маш баяртай байна. Гэхдээ би энд багийнхаа нөхөдгүйгээр зогсож чадахгүй байсан. Багийнхан, дасгалжуулагч гээд тэд нараараа бахархаж байна. Шилдэг багуудтай өрсөлдөж, анхны жинхэнэ S зэрэглэлийн цомоо одоо л авлаа. Үүнийг харах бахдам байна.
Бидний хамгийн том өрсөлдөгч болох "Vitality"-г л хожно гэдэг нь өөрөө маш том итгэх итгэлийг авчирсан. Бид тэднийг хоёр удаа хожлоо. Энэ бол бид сайжирч байгааг илтгэж буй хэлбэр. Гэхдээ бидэнд анхаарах юмнууд бий. Өнөөдрийн тоглолтод бид олон хүнд, барцадтай раундуудыг давсан. Бүхэл бүтэн улс, бүс нутаг маань биднийг дэмжиж байна. Мөн гэр бүл, хамаатан садан, монголчууд маань бий. Энэ бүхнийг харах итгэмээргүй” гэсэн нь хувь хүний бус багийн амжилтыг тодотгосон төлөв байгааг илтгэнэ. Риядад болсон дэлхийн аваргын тэмцээнээр цом өргөсөн мөч нь түүний карьерын оргил ч, өөрийн үгээр “зөвхөн эхлэл” юм. bLitz буюу Гарьдмагнайгаар ахлуулсан залуу бүрэлдэхүүнтэй “The MongolZ” өнгөрсөн хоёр жилийн турш том тайзан дээр нэрээ тасралтгүй дуудуулж, И-спортын оргил болох Major-ын финал хүртэл алхсан.
Дараагийн алхам нь Азиас бус, дэлхийгээс “айдаггүй” баг гэдгээ улирал бүр нотлох. Учир нь тэдний дараагийн зорилго И-спортын оргилд гарч, түүнийгээ ч “Бид өмнөхөөсөө илүү сайжирч байгаа. Бид дахиад хичээх хэрэгтэй гэсэн нь одоогийн амжилтаа илүү өндөрт гаргахыг хүсэж буй.
Д.Дарамбазар
Эх сурвалж: "Зууны мэдээ" сонин
