Өнгөрсөн жилийн улсын баяр наадмаар найм даван үзүүрлэсэн Н.Өсөхбаярын спортын арбитрын хурал хэдэн өдөр хойшилж, эцэст нь өчигдөр/2026.05.11/ шийдвэр гарав. 2025 оны долдугаар сарын 12-ны өдөр Н.Өсөхбаяраас шинжилгээний дээж авахдаа Дэлхийн допингийн эсрэг дүрэм болон допингийн эсрэг үндэсний дүрмийн шинжилгээ, мөрдөн шалгалтын олон улсын стандартаас илт гажисныг тогтоосон. Нэгэнт илт гажсан шинжилгээний хариу цаашид үр дагавар үүсгэхгүй гэжээ. Өөрөөр хэлбэл, дээж авахдаа процессын алдаа гаргасан учир тухайн дээжнээс гарах хариу, үр дагаврыг хүчингүй гэж үзэх гэнэ.
Гэхдээ үүн дээр хэд хэдэн анхаарах зүйл бий.
Нэгдүгээрт, Ерөнхийлөгчийн зүгээс түүний цолыг хураах шийдвэр гаргасан тул аймгийн арслан гэж ярих нь зөв. Хоёрдугаарт, Н.Өсөхбаярын допингийн шинжилгээнээс хориотой бодис илэрсэн. Түүнээс биш түүнийг допинг хэрэглээгүй гэж үзээгүй. Ерөнхийдөө Н.Өсөхбаяр допинг хэрэглэсэн нь WADA буюу Дэлхийн допингийн эсрэг агентлагийн итгэмжлэгдсэн лабораторийн шинжилгээгээр тогтоогдсон. Гагцхүү гол асуудал нь Н.Өсөхбаяр өөрийгөө хорлогдсон хэмээгээд МОНАДА буюу Монголын үндэсний допингийн эсрэг байгууллага шинжилгээний сорьц авах үеэрээ процессын алдаа гаргасан гэж гомдол гаргасан хэрэг. Үүнийг нь Монголын олон улсын ба үндэсний спортын арбитр хүлээн авч, шийдвэр гаргалаа.
Н.Өсөхбаярын хувьд ч хэдэн ноцтой алдаа гаргасныг МОНАДА-аас мэдээллэсэн. Тодруулбал, өнгөрсөн жилийн бүх цэргийн наадмын үеэр явцын шинжилгээ авах гэтэл зугтаасан, холбогдох цахим шуудангаа алдаатай мэдүүлсэн зэрэг асуудал үүсчээ.
Харин МОНАДА-ийн хувьд наадмын үеэр бөхчүүдээс сорьц авахдаа, тээвэрлэхдээ, дараа нь үр дүнгийн удирдлага хэрэгжүүлэхдээ алдаа гаргажээ. Тухайлбал, олон улсын стандартыг зөрчиж, тамирчны үндсэн эрхийг хангаагүй аж. МОНАДА-ийн бүхий л асуудал С.Зүчи гэх хүнтэй холбогдсон. Түүний хувьд тус байгууллагын гадаад харилцааг хариуцдаг байжээ. Гэвч саяхан ажлаа хүлээлгэн өгсөн байна.
Ганцхан хүн бүхий л асуудлыг хариуцах нь ашиг сонирхлын зөрчил гэж спортын арбитр үзсэн юм. С.Зүчийн хувьд тамирчдаас дээж авахаас эхлээд тээвэрлэх, хариуг хүлээн авах, мөрдөн шалгах ажиллагаанд оролцох, үр дүнгийн удирдлагын багт орж ажиллах зэрэг олон ажлыг хийдэг байв.
Хэрэв МОНАДА допингийн сорьц цуглуулах, тээвэрлэх, хариуг мэдэгдэх, үр дүнгийн удирдлага хэрэгжүүлэхдээ тамирчны эрхийг бүрэн хангах зэрэг олон улсын стандартын дагуу ажилласан бол Н.Өсөхбаяр допингоо хүлээн зөвшөөрөн шийтгэл хүлээх байв. Гэвч МОНАДА-аас өмнөх алдаануудаасаа суралцсангүй. Бөхчүүд тэднийг спортын арбитр дээр ялсаар байна.
Цаашид 21 хоногийн дотор баяр наадмын зохион байгуулах комиссоос дээрх шийдвэрийг давж заалдах эрхтэй. Ингэхдээ CAS буюу Олон улсын арбитрын шүүх дээр давж заалдах гэнэ. Хэрэв шийдвэртэй санал нийлвэл Н.Өсөхбаяр цолоо эргүүлэн авах, барилдах эрхээ сэргээлгэх талаар дараагийн арга хэмжээнүүдийг авна.
News.mn
