Арилжааны банкууд ипотекийн зээл хүссэн 47 мянган иргэний өргөдөлд дарагдаад байгаа ч эх үүсвэр дутмагаас энэ жилдээ багтаан шийдвэрлэх боломжгүйд хүрсэн. Ипотекийн зээлийн эргэн төлөлтөөс орж ирэх эх үүсвэрээр дээрх иргэдийн хүсэлтийг шийдвэрлэнэ гэвэл бараг 10 жил ч хүлээж мэдэхээр байгаа юм.

Харин Засгийн газар ирэх долоо хоногт Орон сууцжуулалтын банкны тухай, Орон сууцны тухай хуулийн төслийг хэлэлцэх төлөвтэй байна. Хэрвээ Засгийн газрын хуралдаанаар дээрх хуулийн төслүүд дэмжигдвэл УИХ-д өргөн баригдана. Парламентаар хуулийн төслийг баталснаар Ерөнхий сайдын санаачилсан шэйр моргейж хөтөлбөр хэрэгжих боломжтой болох аж. Энэ тохиолдолд шэйр моргейжийн зээлийн хүү 12, 14 хувьтай байх хувилбар яригдаж байгаа юм.

Мөн шэйр моргейж хөтөлбөр хэрэгжвэл урьдчилгаа төлбөрийг бууруулах боломж бүрдэх нь. Хот байгуулалт, барилга, орон сууцжуулалтын яамны Төрийн нарийн бичгийн дарга М.Баяраагийн өгсөн мэдээллээр "200 сая төгрөгийн үнэтэй орон сууц худалдан авах боллоо гэхэд эхэлж 15 хувийн урьдчилгааг иргэн эхэлж төлнө. Энэ тохиолдолд 200 сая төгрөгийн үнэтэй байрны урьдчилгаанд 30 сая төгрөг төлнө, үлдсэн хэсэг дээр нь банкны зээл авна. Мөн тухайн байрны үлдэж байгаа 50 хувийн төлбөрөө түрээслэх зарчмаар, төлбөрөө боломжтой үедээ төлж дуусгах уян хатан зохицуулалт үйлчлэх нь. Тухайлбал, тухайн моргейжийн зээлийг 15 жилийн хугацаатай авлаа гэхэд мөнгөтэй болсон үед түрүүлж төлбөрөө хийж болох аж. Энэ тохиолдолд хугацаанаасаа өмнө үлдэгдэл төлбөрөө төлснөөр өөрийнхөө нэр дээрх байраа шилжүүлэн авах боломжтой болох юм байна.

Харин өнөөдөр хүчин төгөлдөр үйлчилж байгаа жилийн 6-8 хувийн хүүтэй ипотекийн зээлийг зорилтот бүлэгт чиглүүлэх нь. Орон нутагт амьдарч байгаа иргэн болон анх удаа орон сууцны зээл хүсэж байгаа, мөн хөгжлийн бэрхшээлтэй иргэн зэрэгт хүргэхэд анхаарах нь.

Г.ХОРОЛ