Нам төвтэй эдийн засгийн бүлэглэлээс татгалзсан олон нийт бие даагчдыг илт дэмжиж байгааг улс төрийн намууд анхааралтай ажиглаж, бас ямар алхам хийхээ бодож олжээ. БИД76 нэгдлээс Хэнтий аймагт нэр дэвшихээр болсон хууль зүйн ухааны доктор Л.Батжавыг МАН-ын дарга У.Хүрэлсүх, тус тойргоос нэр дэвшихээр болсон Л.Оюун-Эрдэнэ, Б.Бат-Эрдэнэ нар ятган өөрсдийн эгнээндээ нэгтгэж чаджээ. Бие даахаар гарын үсгээ цуглуулж амжсан Л.Батжав нэрээ татсанаас гадна Ерөнхий сайдын орон тооны бус зөвлөх болов. АН болон бусад намыг сонгох магадлал маш бага учир тойргийнхоо хамгийн их санал хуваах магадлалтай бие даагчийг ийнхүү “намналаа”.
Аль байдгаа барж, үнэн төрхөө илчлэн “алаан”-тай байгаа АН-ынхан энэ удаагийн сонгуульд элгээрээ хэвтэх нь нэгэнт тодорхой болсон учир МАН-ынхан ялалт байгуулах магадлалтай бие даагчдыг ямар нэгэн аргаар өөрсдийн болгоход илүү анхаарч эхэлжээ.