С.Зориг агсны гэргий Б.Булган байцаалт дахин өглөө

Тагнуулын ерөнхий газрын Мөрдөн шалгах хэлтсийн мөрдөн байцаагч төр, нийгмийн зүтгэлтэн С.Зориг агсны гэргий Б.Булганаас өнөөдөр дахин  байцаалт  авчээ. Энэ талаар эх сурвалж хэлэхдээ, “Б.Булган өнөөдөр 12.00-13.00 цагийн үед өөрийн өмгөөлөгч Ц.Гүенбаттай хамт байцаалт өгсөн” гэв. Өнгөрсөн дөрөвдүгээр сарын 18-нд Б.Булганыг яллагдагчаар татаж, байцаалт авсан гэдгийг Нийслэлийн прокурорын газрын хяналтын прокурор Г.Бясман мэдээлсэн юм. Харин Улсын ерөнхий прокурорын орлогч Г.Эрдэнэбат “Цензургүй яриа” нэвтрүүлэгт оролцохдоо илүү дэлгэрэнгүй мэдээлэл өгсөн. Тэрээр “С.Зориг агсны хамтран амьдрагч асан Булганыг яллагдагчаар татсан. Анх гэрч, дараа нь хамжигчаар тооцон шалгаад, хөөн хэлэлцэх хуулийн хугацаа 2015 онд дууссан учраас хэргийг хэрэгсэхгүй болгосон. Одоо Б.Булганыг Зоригийг хөнөөсөн хэрэгт захиалга өгсөн, хамтран зохион байгуулсан гэж сэжиглэн шалгаж байгаа. Энэ хэргийг шалгаж дуусаагүй байна”гэсэн байдаг.