ХЭҮК-ийн хүнлэг бус хуульч П.Оюунчимэгийг бушуухан зайлуулах хэрэгтэй болжээ

“Хуульчид хамгийн хүнлэг хүмүүс байх ёстой” хэмээн эрх зүйн онолчид эртнээс сургамжилсаар ирсэн. Харамсалтай нь манай зарим хуульчид бусдын зовлонгоор хоол олж идэхийн төлөө  хүнлэг чанар, шударга ёсыг уландаа гишгэж дэвслэх болсон гэвэл хэтрүүлсэн болохгүй. Энэ талаар олон жишээ баримт сөхөж болохоор байна. Тухайлбал, Хүний эрхийн үндэсний комиссын гишүүнээр 2013 оноос хойш тасралтгүй ажиллаж байгаа хуульч П.Оюунчимэг тэдний л  өрөөсөн дугуй болжээ. 

Ц.Элбэгдоржийг  Ерөнхийлөгч байх үед  түүний санал болгосноор П.Оюунчимэг нь ХЭҮК-ийн гишүүн болсон бөгөөд энэ оны 2 дугаар сарын 6-нд хууль ёсоор ажиллах бүрэн эрхийн хугацаа дууссан ч одоогийн Ерөнхийлөгч Х.Баттулга болон ойр орчмынх нь хүмүүсийг бараадан, дахиад улиран ажиллах санаатай хөөцөлдөж яваа юм байна. Гэхдээ П.Оюунчимэгт тийм боломж олдохгүй байх. Учир нь дээр өгүүлсэн хүнлэг бус хуульч гэсэн ангилалд  зүй ёсоор багтах хүн тул албан тушаалаас чөлөөлөгдөж таарна. Гэвч хэзээ вэ. Мөн яагаад одоо болтол бүрэн эрхийн хугацаа дууссан хүнийг ажиллуулсаар байгаа зэрэг нь ихээхэн анаарал татаж байна. Нөгөөтэйгүүр, түүний элдэв ёс бус авир араншин,  хуйвалдаануудынх нь  балаг сүүлдээ бүр дийлэхээ болих шинжтэй болоод байгааг ч энд дахин нурших юун.

П.Оюунчимэг нь  өөрийн үүсгэн байгуулсан  “Жи Би эс Импекс” компаниар дамжуулан Эрдэнэт үйлдвэрт бараа шахдаг байжээ. Гэвч түүний энэ компани гэрээгээр хүлээсэн үүргээ удаа дараа хангалтгүй биелүүлж  байсан тул одоо АТГ-т шалгагдаж байгаа Ц.Даваацэрэн Эрдэнэтийн захирлаар томилогдож очоод  найдваргүй компанийн жагсаалтанд оруулан дахиж бараа таваар нийлүүлэх гэрээ хийхээ больсон байв. Ер нь П.Оюунчимэг Эрдэнэт үйлдвэрийг нэг бус удаа хулхидаж байсан гэдэг.

Мөн түүнээс гадна П.Оюунчимэгийн хүү  Б.Жавхлантөгс гэгч нь  2014 оны 9 дүгээр сарын 23-ны өдөр Номун Виллаж хотхонд 106.5 мкв талбай бүхий дөрвөн өрөө орон сууцыг 298.2 сая төгрөгөөр худалдан авах гэрээ хийгээд уг байрандаа нүүж орсон байна. Гэвч худалдах, худалдан авах гэрээнийхээ үүргийг үл тоож, 298.2 сая төгрөгөө одоо болтол төлөөгүй яваа ажээ. Иймд анх уг байрыг худалдсан иргэн Т.Бат-Эрдэнэ өөрийн компанийг төлөөлөн шүүх, цагдаагаар явж зарлагдсан боловч мөнгөө бас л авч чадаагүй байна. Яагаад бүтэн таван жил гаруй болоход нэг ч төгрөг төлөөгүй юм бэ гэдгийг сонирхож  асуухад Т.Бат-Эрдэнэ нь энэ талаар хийсэн хэвлэлийн хурлынхаа үеэр “П.Оюунчимэг цагдаа хуулийнханд нөлөөлөөд байгаа юм” гэсэн товч хариултыг өгч  байлаа. Мөн хүүд нь тэр байрыг  худалдсан  иргэн, компанийг ч буруутгах гэж оролдож байгаа юм байна. Өнгөрсөн оны нэгдүгээр сараас байраа чөлөөлж өгөхийг шаардсан боловч бас л үл тоомсорлон хөдөлж өгөөгүй ажээ.  Аргаа барсан худалдагчид нь сүүлдээ цагдаад хандсан байна. Гэтэл  П.Оюунчимэгийн нөлөөллөөр бас л асуудлыг шийдэх өгөлгүй, хэргийг удаашруулсаар байгаа нь  хөөн хэлэлцэх хугацаа дуусахыг хүлээж буй нь тодорхой болов бололтой. Саяхан Т.Бат-Эрдэнэ  үүнийг нь нотолж хэлэхдээ “Хан-Уул дүүргийн цагдаагийн нэгдүгээр хэлтэст эрүүгийн хэрэг үүсгэн шалгаж байгаа. Гэхдээ тун удахгүй хөөн хэлэлцэх хугацаа дуусна. Тиймээс Засгийн газар, Ерөнхий сайд, УИХ-д хандан П.Оюунчимэгийг албан тушаалаас чөлөөлөхийг шаардаж байна” гэсэн юм.

Хуульчийн ёс зүйг хатуу баримталж, ямар ч үед бусдыг хохироохгүй байх нь ХЭҮК-ийн гишүүний эрхэм үүрэг баймаарсан. Харамсалтай нь П.Оюунчимэг хуульчийн хувьд дэндүү ялзарч яваа юм байна.  Бусдыг айлган сүрдүүлэхийг оролдохдоо “Би хэнийг ч шоронд хийлгэж чадна” гэх мэтээр аашилдаг болж. Энэ нь хуульч хүний амнаас гармааргүй л зэвүүн үг юм шүү дээ. Иймээс нэгэнт бүрэн эрхийн хугацаа нь дуусчихаад есөн сар гаруй болж буй түүнийг төрийн энэхүү өндөр, зөөлөн суудлаас бушуухан буулгаж зайлуулах хэрэгтэй болжээ.

О.Баяр

Шуурхай.мн