Өчигдөр Их Британийн засгийн газар Оросын долоон олигархийг эдийн засгийн хоригтоо нэмж, хөрөнгийг нь битүүмжлэх шийдвэрээ зарлалаа.
Тэдний дотор Английн хөл бөмбөгийн Премьер Лигийн Челси клубийн эзэн Роман Абрамович багтжээ.
Абрамовичоос гадна аж үйлдвэрийн магнат Олег Дерипаска, Роснефтийн гүйцэтгэх захирал Игорь Сечин, Газпромын тэргүүн Алексей Миллер зэрэг Кремльд нөлөө бүхий тэрбумтнууд хоригт багтсан байна.
Роман Абрамович өнгөрсөн долоо хоногт Челси клубээ зарах шийдвэрээ зарлаад байсан юм. Тэрбээр 2003 онд уг клубийг худалдан авч байжээ. Гэвч хоригт орсноор түүний наймаа хэрэгжих боломжгүй болж байна.
Их Британийн засгийн газар Абрамовичийн нийт хөрөнгийн хэмжээг $12.2 тэрбум гэж тооцоолсон байна. Гэхдээ эрх баригчид Челси клубт хөл бөмбөгтэй холбоотой үйл ажиллагаагаа хэвийн үргэлжлүүлэхийг нь зөвшөөрчээ.
Абрамович, Дерипаска, Сечин, Миллер нараас гадна ВТБ банкны ерөнхийлөгч Андрей Костин, Транснефтийн ерөнхийлөгч Николай Токарев, Банк Россиягийн ерөнхийлөгч Дмитрий Лебедев нар энэ удаагийн хориг арга хэмжээний хохирогч болцгоосон байна.
Их Британийн ерөнхий сайд Борис Жонсон шинэ хоригийг засгийн газар нь “Украины ард түмнийг тууштай дэмжиж байгаагийн ээлжит илэрхийлэл” гэж нэрлэжээ.
Эх сурвалж: Reuters