Их Британи улсын төрийн тэргүүн, хатан хаан Элизабет 96 насандаа таалал төгссөнийг Букингэмийн ордноос Улаанбаатарын цагаар өнгөрсөн шөнө мэдээлжээ.

“Хатан хаан өнөөдөр үдээс хойш Балморал шилтгээнд тайван байдалтайгаар хорвоог орхилоо. Хаан, хатан хоёр өнөө орой Балморалд үлдээд маргааш Лондон руу буцна” гэж Букингэмийн ордон албан ёсоор мэдээлсэн байна.

Элизабет нь 70 жил төр барьсан, Их Британийн түүхэнд хамгийн удаан ширээнд суусан хаан юм.

Тэрбээр 1952 онд эцэг хааныг нас барсны дараа ширээг нь залгамжилж байжээ. Сүүлийн саруудад хатан хааны бие чилээрхэж, олон нийтийн арга хэмжээнд оролцох нь ховордоод байв.

Одоо түүний хүү Чарльз хаан ширээг залгамжилж, Гуравдугаар Чарльз Хаан болно. Ач хүү хунтайж Уилльям нь угсаа залгамжлах дараагийн хүн болж байна.

Одоо 73 настай Чарльз нь Британийн түүхэнд хамгийн өндөр насандаа хаан ширээнд суусан хүн болох юм.

Хоёр хоногийн өмнө хатан хаан Элизабет улсынхаа шинэ ерөнхий сайд Лиз Трассыг хүлээн авч, засгийн газраа байгуулах зөвшөөрөл өгч байв. Хөдөлгөөний бэрхшээлтэй болсон хатан хаан Лондонд очиж чадаагүй тул Шотланд дахь Балморал шилтгээндээ шинэ ерөнхий сайдыг хүлээж авсан юм.

Элизабет хатан хааны засаглалын үед нийт 15 ерөнхий сайд томилогдож байсны анхных нь Уинстон Черчилл байжээ.

“Эрхэмсэг дээдэс, хатан хаан таалал төгссөн нь манай үндэстнийг төдийгүй дэлхий дахины хүн ардыг цочроолоо. Хатан хаан Хоёрдугаар Элизабет бол орчин үеийн Британийг босгосон тулгын чулуу байв. Түүний засаглалын үед манай улс хөгжиж, цэцэглэсэн. Түүний ачаар өнөөдрийн Британи аугаа хүчирхэг байгаа юм” гэж ерөнхий сайд Лиз Трасс мэдэгджээ.

17 сарын өмнө хатан хааны нөхөр, Эдинбургийн гүн, хунтайж Филип 99 насандаа өөд болсон юм.

Дэлхийн улс орнуудын төрийн тэргүүнүүд хатан хааны араас эмгэнэл илэрхийлсээр байна.

Элизабет нь Их Британийн түүхэнд хамгийн удаан төр барьсан хаан байлаа. Төр барьсан хугацаагаар тэр өөрийн элэнц эмээ Викториа хатан хааны урд бичигддэг. Дэлхийн түүхэнд энэ үзүүлэлтээр түүний урд орох ганц хүн нь Францын XIV Луй хаан юм.

Хатан хаан Элизабет 1926 оны дөрөвдүгээр сарын 12-ны өдөр Лондон хотод Йоркийн гүн, гүнгийн ахайтан хоёрын анхны хүүхэд болон мэндэлж байжээ. Тухайн үед тэр өөрийн эцэг, авга ах нарын дараа хаан ширээг залгамжлах гурав дахь хүн болж байв.

Хатан хаан дөрвөн хүүхэд, найман ач, зээ, 11 гучтай хүн байжээ.

Эх сурвалж: BBC