Даваа гарагт НҮБ-ын уур амьсгалын суурь конвенцод нэгдэн орсон орнуудын 27 дахь удаагийн чуулган Cop27 Египет улсын Шарм-Эль-Шэйх хотод эхэллээ.

НҮБ-ын ерөнхий нарийн бичгийн дарга Антонио Гутерреш чуулганыг нээж хэлсэн үгэндээ дэлхий нийт “уур амьсгалын там руу” хурдны замаар давхиж буйг анхааруулжээ.

“Бид амьд үлдэхийн төлөө тулаанд ороод ялагдаж явна. Уур амьсгалын гамшиг эргэлт буцалтгүй болох цэг рүү манай гараг хурдтай ойртож байна. Бид хөлөө хурдасгуур дээр тавиад уур амьсгалын тамд хүрэх хурдны замаар давхиж явна” гэж тэр дэлхийн улс орнуудын удирдагч нарт хандаж хэлсэн байна.

Ирэх хоёр долоо хоногийн хугацаанд дэлхийн хөгжиж буй болон хөгжингүй орнууд хүлэмжийн хийгээ бууруулах түүхэн гэрээнд нэгдэх, эсвэл тохиролцоонд хүрч чадалгүй сүйрэл рүү явах хүнд хэцүү сонголтын өмнө ирээд байгааг Гутерреш анхааруулжээ.

“Бид уур амьсгалын эв нэгдлийн гэрээнд, эсвэл хамтдаа амиа хорлох гэрээнд гарын үсэг зурах сонголтын өмнө ирээд байна” гэж тэр хэлсэн юм.

НҮБ-ын тэргүүн цааш нь хэлэхдээ “Боломжийг ашиглах цонх нээлттэй хэвээр байгаа ч түүгээр гэрлийн нарийхан зурвас л нэвтэрч байна. Уур амьсгалын өөрчлөлттэй хийх тэмцэлд ялах эсвэл ялагдах нь энэ арванд шийдэгдэх болно. Энэ тэмцэлд бууж өгсөн бүхэн хохирох нь нэгэнт тодорхой болжээ” гэсэн байна.

Чуулганыг зохион байгуулагч орон Египетийн ерөнхийлөгч Абдел Фатах Аль Сиси нээлтийн үгэндээ дэлхийн ядуу буурай орнууд уур амьсгалын өөрчлөлтийн гамшгийн хохирогч болж эхэлснийг анхааруулжээ.

“Уур амьсгалын гамшгийн эрч хүч, давтамж дэлхийн өнцөг булан бүрд урьд өмнө байгаагүй өндөр хэмжээнд хүрч, хэдэн тэрбум хүний амьдралд зовлон зүдгүүрийн давлагааг авчраад байна. Энэ зовлонг таслан зогсоох цаг өнөөдөр биш гэж үү?” гэж тэр хэлсэн юм.

Египетийн аялал жуулчлалын төв Шарм-Эль-Шэйх хотод дэлхийн 100 гаруй улсын төр, засгийн тэргүүнүүд цуглараад байна. Тэд хоёр өдрийн турш хаалттай хуралдсаны дараа олон нийтийн арга хэмжээнүүдэд үргэлжлэх юм.

Гэхдээ энэ удаагийн чуулганаар томоохон шийдэлд хүрэх магадлал бага байна. Украины дайнтай холбоотой дэлхий дахинд үүссэн эрчим хүчний хямрал, эдийн засгийн хүндрэл уур амьсгалын өөрчлөлттэй тэмцэх үйлсэд томоохон бэрхшээл учруулаад байгаа.

Уур амьсгалын өөрчлөлтөд хамгийн их хохирол амсаж буй ядуу буурай орнууд байгалийн гамшигтай тэмцэх ажлаа хөгжингүй орнуудаар санхүүжүүлэх сонирхлоо илэрхийлээд байна. Дэлхийн дулаарлыг түргэсгэгч хүлэмжийн хийн ихэнхийг баян чинээлэг орнууд үүсгэдэг гэсэн үндэслэлээр тэд энэ асуудлыг тавьж байгаа юм.

Тухайлбал хөгжиж буй орнуудын уур амьсгалын өөрчлөлттэй тэмцэх ажлыг санхүүжүүлэх сан байгуулах санаачилгыг Барбадос улсын ерөнхий сайд Миа Моттли гаргажээ. Уг санаачилгад Африкийн хэд хэдэн орны удирдагчид нэгдсэн байна. Эхний хоёр өдрийн хуралдааны дараа төр, засгийн тэргүүнүүдийн эхлүүлсэн ажлыг сайд нар болон бусад албаны хүмүүс цааш үргэлжлүүлэн хэлэлцэх юм.

Эх сурвалж: The Guardian