Герман улсын засгийн газар 18 нас хүрч буй бүх иргэддээ 200 еврогийн дүнтэй Kulturpass хэмээх тасалбар бэлэглэхээр болжээ.

Ийм эрхийн бичгээр залуус хоёр жилийн дотор үнийн дүнд багтаан төрөл бүрийн соёл урлагийн байгууллагаар сонгон үйлчлүүлэх боломжтой юм.

Эхний ээлжид 2023 онд 18 хүрэх 750,000 орчим залуу энэхүү тасалбарыг авах эрхтэй болж буйг Германы соёлын сайд Клаудиа Рот мэдээлжээ.

Хөтөлбөр нь хоёр үндсэн зорилготой гэнэ. Нэг талаас залуусын урлагийн мэдлэг боловсролыг дээшлүүлж, цар тахлын улмаас үүссэн гэртээ хоргодох сэтгэлгээг өөрчлөх, нөгөө талаас эдийн засгийн хямралтай цаг үед урлаг соёлын байгууллагуудаа дэмжих ажээ.

Европын Холбооны гишүүн Франц, Итали, Испани улсуудад үүнтэй төстэй арга хэмжээ хэрэгждэг.

Соёлын тасалбарын хөтөлбөрт Герман улс эхний жилдээ 100 сая евро зарцуулахаар төлөвлөжээ. Тус улсын соёл урлагийн салбарын төсөв жилд 2.3 тэрбум евро хүрдэг байна.

Хэрвээ хөтөлбөр эхний жилдээ амжилттай хэрэгжвэл цаашид хамрах насны хүрээг өргөтгөж, 15 наснаас эхлэх боломжтой гэж Германы эрх баригчид мэдэгджээ.

Испани улс өнгөрсөн оноос эхлэн 18 настнууддаа 400 еврогийн эрхийн бичиг бэлэглэдэг болсон. Эхний жил буюу 2022 онд 18 нас хүрэгсдийн 57.6 хувь нь хөтөлбөрт хамрагдах хүсэлтээ гаргасныг Испанийн засгийн газар мэдээлсэн байна.

Франц улсын хувьд 2021 оноос эхлэн 18 настнуудад 300 еврогийн эрхийн бичиг олгох болжээ. Уг эрхийн бичгээр залуус ном худалдаж авах, урлагийн сургалтад хамрагдах, музей, театрын тасалбар авах, хөгжмийн зэмсэг авах боломжтой юм.

Энэ жилээс Францын засгийн газрын уг хөтөлбөр 15 настнуудаас эхлэн үйлчлэх болжээ.

2016 онд Италийн засгийн газар 500 еврогийн хөтөлбөрийг 18 настнуудад хэрэгжүүлж эхэлсэн юм. Италийн соёлын яамны мэдээлснээр залуусын 83 хувь нь эрхийн бичгээ ном худалдаж авахад зарцуулжээ.

Эх сурвалж: The Guardian