Хятадын засгийн газрын хэрэгжүүлж буй цар тахалтай тэмцэх хариу арга хэмжээг Гуанжоу хотын оршин суугчид эсэргүүцэж буйг харуулсан дүрс бичлэгүүд өчигдөр сошиал сүлжээнд олноор тарсан байна.
Гуанжоу бол Хонконгийн ойролцоо оршдог, 19 сая орчим оршин суугчтай, Хятадын томоохон хотуудын нэг юм. Тус хот одоо Хятадад үүсээд буй цар тахлын ээлжит давлагааны гол төв болоод байгаа.
Даваа гарагийн орой тус хотын Хайжу дүүргийн гудамж талбайд олон зуун хүн цугларч, хаалт саадыг буулгах, цагдаагийн автомашиныг онхолдуулах зэргээр эсэргүүцлээ илэрхийлсэн байна.
NEW - People in China's Guangzhou city tear down COVID barricades.pic.twitter.com/M28Rw63APC
— Disclose.tv (@disclosetv) November 14, 2022
Одоо Гуанжоу хотод коронавирусийн халдварын тохиолдол өдөрт 5,000 гаруй бүртгэгдэж байгаа нь цар тахал эхэлснээс хойших хамгийн өндөр үзүүлэлт болж байгаа.
Эрх баригчид хотод хэсэгчилсэн хөл хорио тогтоосон ба хэрвээ халдварын дэгдэлт нэмэгдвэл хот бүхэлдээ хөл хорионд шилжиж болзошгүй гэсэн айдас иргэдийн дунд үүсээд байна.
Олон үйлдвэр, жижиг бизнесийн байгууллагууд төвлөрдөг Хайжу дүүрэгт саяхан хөл хорионы дэглэм тогтоож байжээ.
Үйлдвэрлэгчид жил бүрийн арван нэгдүгээр сарын 11-ний өдөр Хятадад зохион байгуулагддаг онлайн худалдааны наадамд бэлдэж буй цаг үед хөл хорио тогтоосон нь иргэдийг бухимдуулж байгаа аж.
Иргэдийн эсэргүүцэл Хайжу дүүргээс гадна Канлэ, Таншья, Тянхэ зэрэг Гуанжоу хотын бусад дүүргүүдэд гарсныг эх сурвалжууд мэдээлж байна.
Сүүлийн 24 цагийн хугацаанд Хятад даяар коронавирусийн халдварын 17,772 шинэ тохиолдол бүртгэгдсэн тухай өчигдөр эрх баригчид мэдээлсэн юм. Өмнөх өдөр нь халдварын шинэ тохиолдол 16,702 хүрч байжээ. Хятадын засгийн газар өнгөрсөн Баасан гарагт зарим хорио цээрийн журмаа бага зэрэг зөөлрүүлсэн ч цар тахалтай тэмцэх “тэг ковид” стратегиа ойрын үед өөрчлөх шинжгүй байна.
Эх сурвалж: Reuters
