Мягмар гарагт Польш улсын хил орчмын тосгонд Орос хийцийн хоёр пуужин унасны улмаас хоёр энгийн иргэний амь үрэгдсэн билээ.
Хэрвээ пуужинг Оросын талаас харвасан бол НАТО-гийн гишүүн орны нутаг дэвсгэрт халдсан хэрэг болж, Украины дайн өргөжих байв.
Гэвч Польш болон НАТО-гийн удирдлагууд болсон явдлын мөрөөр шалгаад пуужингуудыг Оросын довтолгооныг эсэргүүцэх зорилгоор Украины агаараас хамгаалах системээс харвасан байх өндөр магадлалтай гэж урьдчилсан байдлаар дүгнэжээ.
Тиймээс үүнийг золгүй явдал гэж дүгнээд НАТО-гийн гишүүн орныг хамтарсан хүчээр хамгаалах гэрээний заалтыг хэрэгжүүлэх шаардлага одоогоор байхгүй гэж үзсэн байна.
“Украины агаараас хамгаалах системийн харвасан пуужингийн улмаас дэлбэрэлт болсон байх өндөр магадлалтай гэж (Польш улсын) ерөнхийлөгч Анджей Дуда урьдчилсан байдлаар дүгнэсэнтэй бид санал нийлж байна. Гэхдээ энэхүү эмгэнэлт явдлын эцсийн хариуцлагыг Украин руу пуужин харвасан Орос улс хүлээх нь тодорхой” гэж Цагаан ордноос мэдэгджээ.
ОХУ-ын батлан хамгаалах яам Польшийн нутагт унасан пуужинг Украины армийн агаараас хамгаалах систем С-300-аас харвасан гэж болсон явдлын гэрэл зураг дээр үндэслэн дүгнэснээ мэдэгдсэн байна.
С-300 бол ОХУ-д үйлдвэрлэсэн агаарын довтолгооноос хамгаалах пуужингийн систем юм. Мөн Украинд явуулж буй Оросын агаарын довтолгоо Польшийн хилд 35 км-ээс илүү ойртохгүй байгааг мэдэгджээ.
Харин Украины ерөнхийлөгч Володимир Зеленский НАТО-гийн урьдчилсан дүгнэлтэд эргэлзэж байгаагаа илэрхийлсэн юм.
“Манай пуужин биш гэдэгт би итгэлтэй байна. Манай зэвсэгт хүчнийхний мэдээлснээр бол энэ нь Оросын пуужин байсан” гэж Лхагва гарагийн орой хийсэн мэдэгдэлдээ тэр хэлжээ.
Зеленский бас шалгалтын хэсгийн бүрэлдэхүүнд Украины тал оролцох ёстой гэж үзэж байгаагаа энэ үеэр мэдэгдсэн байна. Өнгөрсөн долоо хоногт Херсон хотоос цэргээ татсан Оросын эрх баригчид энэ долоо хоногт Украины хотуудад өгөх агаарын цохилтоо эрчимжүүлсэн юм.
Даваа гарагт хамгийн багадаа 85 пуужинг Украины хотууд руу харвасан нь дайн эхэлснээс хойших хугацааны хамгийн том агаарын довтолгоо болсныг Киевийн эрх баригчид мэдээлж байв. Оросын цохилтын гол бай нь Украины эрчим хүчний байгууламжууд байсан юм.
Эх сурвалж: Reuters
