Өчигдөр АНУ, ОХУ-ын талууд ялтан солилцох тохиролцоонд хүрч, сагсан бөмбөгийн тамирчин эмэгтэйг зэвсгийн наймаачин эрэгтэйгээр солилцжээ.
Тодруулбал Оросын шоронд есөн жилийн ялтай хоригдож байсан олимпын хошой аварга Бриттни Грайнерыг АНУ-ын шоронд ял эдэлж байсан алдартай зэвсгийн наймаачин Виктор Бутаар сольсон байна.
32 настай Грайнер энэ оны хоёрдугаар сард буюу Украины дайн эхлэхээс хэдхэн хоногийн өмнө Москвад очоод мансууруулах бодис биедээ авч явсан хэргээр саатуулагдаж байв.
Тэрбээр WNBA-ийн тэмцээний завсраар Оросын клубт тоглох зорилготой ирж байжээ.
Зөвлөлтийн армийн офицер асан 55 настай Виктор Бут нь дэлхийн цуутай зэвсгийн наймаачдын нэг байсан юм. “Үхлийн худалдаачин” хочтой тэрбээр Америкчуудын эсрэг ашиглах зорилготой олон саяын үнэ бүхий галт зэвсгийг террорист байгууллагуудад худалдсан хэргээр АНУ-ын шоронд 25 жилийн хорих ял эдэлж байжээ. Бут 2008 онд Тайландад баривчлагдаж, 2010 оноос хойш АНУ-ын шоронд хоригдож байв.
Сүүлийн хэдэн сарын турш Вашингтоны эрх баригчид Грайнерыг суллуулахаар Москвагийн талтай идэвхтэй яриа хэлэлцээ явуулсан юм. Оросууд түүнийг Виктор Бутаар солих санал тавьсан нь ийнхүү биелж байна. Америкчууд эхэндээ Грайнераас гадна тагнуулын ажиллагаа явуулсан хэргээр 16 жилийн хорих ял эдэлж буй тэнгисийн цэргийн офицер асан Пол Уиланыг солилцоонд хамруулах хүсэлтэй байсан юм. Гэвч Оросын тал Бутыг зөвхөн тамирчин эмэгтэйгээр солилцох нөхцөл тавьжээ. 52 настай Пол Уилан 2020 оноос хойш Оросын шоронд хоригдож байгаа.
Грайнер өнгөрсөн сараас Москва хотоос зүүн хойд зүгт 500 км зайтай оршдог Мордовын шоронд ялаа эдэлж эхэлсэн юм.
Эх сурвалж: Associated Press