ОХУ-ын ерөнхийлөгч Владимир Путин өчигдөр хөрш Беларусь улсад айлчилж, тус улсын ерөнхийлөгч Александр Лукашенкотой Минск хотноо хэлэлцээ хийжээ.
Хэдийгээр Орос, Беларусь улсууд холбооны улсын хэмжээнд нэгдэх үйл явц үргэлжилж байгаа, ойр дотно харилцаатай гэдэг ч Путин сүүлийн гурван жилийн хугацаанд анх удаа Минск хотод айлчилж байна.
Хоёр цаг гаруй хугацаанд үргэлжилсэн уулзалтын дараа Путин хамтарсан хэвлэлийн хуралд оролцохдоо хоёр улс батлан хамгаалах салбарын хамтын ажиллагаагаа өргөжүүлэхээр тохиролцсон тухай мэдэгджээ.
Тухайлбал аюулгүй байдлаа хамтран хангах, цэргийн сургуулилалтуудаа үргэлжлүүлэх, зэр зэвсгийн нөөцөө нэмэгдүүлэх зэрэг бүх чиглэлд хамтран ажиллах болсноо мэдэгдсэн байна.
Путин бас Беларусийн нисгэгчдийг цөмийн зэвсэг тээвэрлэгч онгоц жолоодоход сургах, 2023 онд Беларусийн нисгэгчийг сансарт хөөргөх амлалт өгчээ.
Харин Лукашенко тэдний яриа хэлэлцээ хоёр улсын эдийн засгийн хамтын ажиллагаанд анхаарал хандуулсныг онцолсон байна.
“Хамтдаа сорилтыг давж, тэсэж чадсан төдийгүй эдийн засгаа хөгжүүлэх боломжийг олж харж чадсанаа өнөөдөр бид эргэлзээгүйгээр хэлж чадахаар байна” гэж тэр мэдэгджээ.
“Орос бидэнгүйгээр хаашаа ч явж чадахгүй, бид Оросгүйгээр юу ч хийж чадахгүй” гэж Лукашенко энэ үеэр хэлсэн байна.
Путиний айлчлалаас өмнө түүнийг Украины дайнд Беларусийг татан оролцуулах гэж байгаа тухай яриа гарсан юм.
Кремлийн хэвлэлийн төлөөлөгч Дмитрий Песков үүнийг няцааж байв.
Зарим ажиглагчид Путиний айлчлалыг Беларусийн талаас довтлох айдсыг нэмэгдүүлэн Украины талд шахалт үзүүлэх зорилготой гэж тааварлаж байна.
Украин улстай 1,000 км шугамаар хил залгадаг Беларусийн газар нутгийг Оросын эрх баригчид эзлэн түрэмгийлэх дайндаа ашиглаж байгаа. Гэхдээ Беларусийн зэвсэгт хүчин өнөөдрийг хүртэл Украины дайнд оролцоогүй байна.
Эх сурвалж: Reuters
