Өчигдөр буюу Лхагва гарагт ОХУ-ын ерөнхийлөгч Владимир Путин зэвсэгт хүчнийхээ удирдлагуудыг хүлээн авч уулзаж, өнгөрч буй оныхоо ажлыг дүгнэжээ.
Энэ үеэр тус улсын батлан хамгаалахын сайд Сергей Шойгу зэвсэгт хүчнийхээ бие бүрэлдэхүүнийг одоогийн 1.15 саяас 1.5 сая болгон өсгөх санал танилцуулсан байна.
Үүнээс 695,000 нь мэргэжлийн буюу гэрээт цэрэг байх бөгөөд дэвшүүлсэн санал нь Оросын армийн аюулгүй байдалтай холбоотой үүсээд буй асуудлуудыг засаж, залруулахад чухал болохыг Шойгу онцолжээ.
Саналыг дэмжиж байгаагаа илэрхийлсэн Путин цэргийн тусгай ажиллагаанд шаардлагатай бүх дэмжлэгийг үзүүлэхээ амласан байна.
“Мөнгө санхүүгийн хязгаарлалт гэж байхгүй. Армийн хүссэн бүхнийг нь засгийн газар өгөх болно” гэж тэр энэ үеэр хэлжээ.
НАТО-гийн цэргийн эвсэл Оросын эсрэг бүх хүчин чадлаа дайчилж буй тул Сири зэрэг улсад олж авсан байлдааны туршлагаа Украинд ашиглахыг Путин армийн удирдлагууддаа уриалсан байна.
Тэрбээр Украинд үүрэг гүйцэтгэж буй цэрэг, офицеруудаа “баатрууд” хэмээн өргөмжилжээ.
Путин бас 300,000 бэлтгэл хүчийг дайчлах ажиллагаа алдаа дутагдалтай байсныг энэ үеэр дахин хүлээн зөвшөөрсөн байна.
“Хэсэгчилсэн дайчилгаа нь яаралтай шийдвэрлэх шаардлагатай тодорхой асуудлуудыг ил болгосныг бүгд сайн мэдэж байгаа” гэж тэр хэлсэн юм.
Мөн Украинд гаргасан алдаагаа засахад анхаарах, олон нийтийн зүгээс гарч буй шүүмжлэлийг нээлттэй хүлээж авахыг Путин энэ үеэр армийн удирдлагууддаа анхааруулжээ.
“Иргэд, олон нийтийн санаачилга, шүүмжлэлд анхаарлаа хандуулж ажиллахыг батлан хамгаалах яамнаас би хүсэж байна. Ийм том, нарийн төвөгтэй ажиллагаанд үргэлж асуудал гардаг. Асуудлыг олж харсан хүмүүс үүнд сэтгэл хөдлөлөөр хандах нь ойлгомжтой. Тиймээс бид асуудлыг нуулгүй, шүүмжлэлийг сонсож, шийдэл олоход хамтран ажиллах нь чухал байна” гэж тэр хэлжээ.
Эх сурвалж: Reuters