Богдхан төмөр зам төслийг “Улаанбаатар төмөр зам” нийгэмлэгээр хариуцуулан гүйцэтгүүлэх бэлтгэл ажил хийгдэх нь.
Тодруулбал, Засгийн газрын өчигдрийн/2022.12.21/ хуралдаанаас уг төслийг УБТЗ нийгэмлэгээр хийлгэх, төмөр замын шугамыг ОХУ-тай эцэслэн тохирох асуудлыг шийдвэрлэхийг холбогдох сайд нарт даалгажээ. Ингэснээр төслийг хэрэгжүүлэгч компаниа өөрчлөх бололтой.
"Бодь Интернэшнл" компанийн ТУЗ-ийн дарга Д.Баясгалан "Богдхан төмөр зам төслийн гэрээ энэ жилийн дундуур байгуулагдсан. Гэхдээ ажил нь царцчихсан. Хэрэв зогсоох гэж байгаа бол төр засаг шийдвэрээ гаргаад зарцуулсан тооцоогоо нийлээд явахад асуудалгүй" хэмээн мэдээлж байв.
Харин Зам, тээврийн хөгжлийн сайд С.Бямбацогт "Богдхан төмөр замын төсөл өндөр үнээр хийгдсэн хэмээн шалгахаар бүтээн байгуулалтыг зогсоосон" гэсэн юм.
Богдхан төмөр замын төслийн нээлт Төв аймгийн Баян сумын нутаг дэвсгэр Мааньт өртөөнд 2021 онд болж байв. Уг төмөр зам баригдсанаар Улаанбаатарын төвөөр вагон явж түгжрэлд нөлөөлөхгүй гэж үзэж буй.