Он солигдох шөнө Украины Донецк мужийн эзлэгдсэн Макеевка тосгонд Украины арми HIMARS-аар довтолсны улмаас Оросын арми их хэмжээний хохирол амсаад байгаа.
Украины тал Макеевкагийн хуаранд алагдаж, шархадсан цэргийн тоог 400 орчим гэж мэдээлсэн юм.
Оросын хувийн блогчид, батлан хамгаалахын мэргэжилтнүүд ч хохирлын хэмжээг хэдэн зуугаар хэмжигдэж буйг мэдээлж байгаа.
Харин ОХУ-ын батлан хамгаалах яам эхлээд 63 цэргийн алба хаагч алагдсан гэж мэдээлсэн бол өчигдөр 89 болж нэмэгдсэн тухай мэдээлжээ.
Батлан хамгаалах яам бүх шархадсан цэргүүдэд шаардлагатай эрүүл мэндийн тусламж үзүүлэх ажлыг шуурхай зохион байгуулж байгааг өчигдөр Оросын зэвсэгт хүчний хошууч генерал Сергей Серюков сэтгүүлчдэд мэдээлсэн байна.
“Эмнэлгийн анхан шатны тусламж үзүүлж, шархадсан цэргүүдийг эмнэлэгт шилжүүлсэн. Харамсалтай нь хуарангийн балгасыг цэвэрлэх явцад амь үрэгдэгсдийн тоо 89 болж нэмэгдлээ” гэж тэр хэлжээ.
Хувийн гар утсаа дайсны цохилт хүрэх зайд ашигласан нь ийм хэмжээний хохирол амсах гол шалтгаан болсныг Серюков бас тайлбарласан байна.
“Хоригийг үл хайхран дайсны зэвсгийн цохилтын бүсэд хувийн гар утас бөөнөөрөө ашиглаж байсан нь гол шалтгаан болсныг тогтоосон. Энэ хүчин зүйл нь хуарангийн байршлыг нарийн тодорхойлж, пуужингийн цохилт өгөх боломж олгосон байна. Цаашид ийм эмгэнэлтэй хэрэг гаргахгүйн тулд шаардлагатай арга хэмжээг авч ажиллана” гэж тэр мэдэгджээ.
Макеевка тосгон дахь цэргийн хуаранд өнгөрсөн оны есдүгээр сард эхэлсэн дайчилгаагаар цэрэгт татагдсан алба хаагчид байрлаж байсан юм.
Хуарангийн барилгад олон тооны цэрэг нэг дор байрласан, бас сум, зэр зэвсгээ хамт хадгалж байсан нь алдаа болсныг Оросын мэргэжилтнүүд шүүмжилсээр байна.
Тухайлбал Донецк мужийн засаг захиргаанд ОХУ-аас томилогдон өндөр албан тушаал хашиж байсан Павел Губарев ийм алдаатай шийдвэр гаргасан этгээдэд эрүүгийн хэрэг үүсгэх ёстой гэж хувийн сошиал хуудсандаа бичжээ.
“Хэрвээ үүний төлөө хэн ч шийтгүүлэлгүй өнгөрвөл нөхцөл байдал улам муудна” гэж тэр бичсэн байна.
Москва хотын иргэдийн төлөөлөгчдийн хурлын гишүүн Андрей Медведев болсон явдалд гар утсаа ашигласан цэргүүд буруудаад өндөр албан тушаалтнууд шийтгүүлэлгүй өнгөрөхөөс болгоомжилж байгаагаа Телеграм хуудсандаа бичжээ.
Тэрбээр энэ талаар “Амиа алдсан цэргүүдийг бүх зүйлд буруутгаад амссан хохирлын талаар чимээгүй өнгөрөхийг оролдсон хүмүүсийн нэр түүхэнд хараар бичигдэж үлдэх нь дамжиггүй” гэж анхааруулсан юм.
Өчигдөр Украины тал он солигдох үеэр фронтын өөр бас нэг хэсэгт амжилттай довтолж, Оросын 500 орчим цэргийг устгаж, шархдуулсан тухайгаа мэдээлжээ.
Тодруулбал Днепр мөрнөөс өмнө зүгт 20 км зайтай оршдог Херсон мужийн Чулаковка тосгон дахь Оросын цэргийн хуаранд HIMARS-аар цохилт өгсөн тухай мэдээлсэн байна.
Одоогоор ОХУ-ын батлан хамгаалах яам энэ талаар мэдээлэл өгөөгүй байна.
Өчигдөр ОХУ-ын ерөнхийлөгч Владимир Путин амиа алдсан Үндэсний Гвардын цэргүүдийн ар гэрт нэг удаа таван сая рублийн ($69,000) тэтгэмж олгох зарлигт гарын үсэг зуржээ. Тэрбээр одоогоор Макеевкад болсон эмгэнэлт явдлын талаар ямар нэг байр суурь илэрхийлээгүй байгаа юм.
Эх сурвалж: BBC, ТАСС